مناء رانا بی بی سی اردو ڈاٹ کام، لاہور

	شعیب جیسا بولر کبھی بھی کھیل کا پانسا پلٹ سکتا ہے

باب وولمر پیر اور منگل کی درمیانی رات لاہور پہنچے اور منگل کو پاکستان کی ٹیم کے فٹنس کیمپ میں تربیت کے لیئے آئے۔

باب وولمر کے مطابق انگلینڈ کی ٹیم اپنی ہوم گراؤنڈ پر ایک مضبوط ٹیم ہے اور پاکستان کی ٹیم کو اس کے خلاف سخت محنت کرنا ہو گی۔

باب وولمر خوش تھے کہ کھلاڑیوں نے ان کی غیر موجودگی میں بھی کافی ذمہ داری سے تربیت کی۔

	انگلینڈ میں جیتنے کے لیئے کھلاڑیوں کو کافی محنت کرنا پڑے گی

باب وولمر نے مزید کہا کہ عمران فرحت نے دوسرے اینڈ کو بطور اوپنر سنبھال رکھا ہے اور اس وقت اس اوپننگ جوڑی کو تبدیل کرنے کا کوئی جواز نہیں۔

فاسٹ بالر شعیب اختر کی بابت باب وولمر نے کہا کہ پوری طرح فٹ شعیب اختر کسی بھی ٹیم کے لیئے اثاثہ ثابت ہو سکتے ہیں اور صرف انگلینڈ کی وکٹیں ہی نہیں وہ ہر طرح کی وکٹ پر اپنی تیز رفتار گیند کے سبب تباہ کن بالر ثابت ہو سکتے ہیں۔ ’لیکن ضرورت اس بات کی ہے کہ وہ مکمل فٹ ہوں ان کے ٹخنے پر حال ہی میں چوٹ لگی ہے اس کے سکین کی رپورٹ کے بعد ہی دیکھیں گے کہ اس چوٹ سے کیسے نمٹا جائے‘۔

انہوں نے کہا شعیب اختر کے علاوہ رانا نوید اور آصف بھی مؤثر ہو سکتے ہیں کیونکہ وہ آج کل انگلینڈ میں اچھی کارکردگی دکھا رہے ہیں۔

جونٹی روڈز کو بطور عارضی فیلڈنگ کوچ کے پاکستان کرکٹ بورڈ کے فیصلے کو سراہتے ہوئے باب وولمر نے کہا کہ اس سے فائدہ ہو گا۔

باب وولمر نے لاہور کے درجہ حرارت اور انگلینڈ کے درجہ حرارت میں فرق کو تسلیم کرتے ہوئے کہا کہ اس کا اثر ہو سکتا ہے کیونکہ سرد موسم سے پٹھوں میں کھچاؤ ہو سکتا ہے لیکن ہم اس سے نمٹ لیں گے۔

انہوں نے ازراہ مزاہ کہا کہ اتنی گرمی میں تربیت سے ایک فائدہ تو ہو گا کہ کھلاڑی گرمی کی سختی کے عادی ہو جائیں گے۔