عبدالرشید شکور بی بی سی اردو ڈاٹ کام، کراچی

	شاہد آفریدی نے 24 ٹیسٹ میچوں میں پاکستان کی نمائندگی کی ہے۔

شاہد آفریدی کا کہنا ہے کہ’اس وقت ٹیسٹ اور ون ڈے کرکٹ بہت زیادہ ہوگئی ہے اور میں چاہتا ہوں کہ ون ڈے کرکٹ پر اپنی توجہ مرکوز رکھوں کیونکہ میری نظریں ورلڈ کپ پر لگی ہوئی ہیں‘۔

انہوں نے بتایا کہ’اس فیصلے کے لیئے مجھ پر کسی قسم کا دباؤ نہیں تھا‘۔ان کا کہنا تھا کہ ورلڈ کپ کے بعد وہ ٹیسٹ کرکٹ کھیلنے کے لیئے پاکستانی ٹیم کو دستیاب ہوں گے۔

جب شاہد آفریدی سے پوچھا گیا کہ کیا انہوں نے اس فیصلے سے کرکٹ بورڈ کو آگاہ کر دیا ہے تو انہوں نے کہا کہ’میں نے اس بارے میں اس فیصلے سے کپتان انضمام الحق کو آگاہ کر دیا ہے‘۔

کرکٹ میں ایسی مثالیں عام ہیں کہ مخصوص حالات میں کرکٹرز نے ون ڈے یا ٹیسٹ کرکٹ میں سے کسی ایک کو اپنانے کا فیصلہ کیا ہو لیکن شاہد آفریدی کا یہ فیصلہ اس لیئے بھی حیران کن ہے کہ وہ دونوں طرز کی کرکٹ میں مقبول اور کامیاب رہے ہیں۔

	آفریدی پاکستانی تماشائیوں کے پسندیدہ کھلاڑی ہیں

دھواں دھار بلے بازی کے لیئے مشہور چھبیس سالہ شاہد آفریدی نے اب تک چوبیس ٹیسٹ میچوں میں پاکستان کی نمائندگی کی ہے اور وہ پانچ سنچریوں اور آٹھ نصف سنچریوں کی مدد سے 1634 رنز بنا چکے ہیں۔ آفریدی نے اب تک ٹیسٹ کرکٹ میں 44 وکٹیں بھی حاصل کی ہیں۔

ون ڈے کرکٹ میں آفریدی نے 222 ون ڈے میچوں میں 4 سنچریوں اور 26 نصف سنچریوں کی مدد سے 4824 رنز بنائے ہیں اور 184 وکٹیں حاصل کی ہیں۔ وہ 215 چھکوں کے ساتھ ون ڈے کرکٹ میں سب سے زیادہ چھکے لگانے والے کھلاڑی بھی ہیں۔