ہو سکتا ہے کہ اگلی چیمئنز ٹرافی سچن تندولکر کے بغیر منعقد ہو۔

بھارت کرکٹ بورڈ کا کہنا ہے کہ آئی سی سی چیمپئنز ٹرافی اکتوبر ہونے کی وجہ سے بورڈ کو حاصل ہونے والے آمدنی کم ہو جاتی ہے۔

بھارتی کرکٹ بورڈ کے نائب صدر للت مودی کا کہنا ہے کہ بھارتی ٹیم 2007، 2008 اور 2009 میں اکتوبر کے مہینے میں فارغ نہیں ہو گی اور ہم یہ بات آئی سی سی کو کئی مرتبہ بتا چکے ہیں۔

’اگر دوسرے کھیلنا چاہتے ہیں تو کھیلیں لیکن ہم اکتوبر میں نہیں کھیلیں گے۔‘

بھارتی کرکٹ بورڈ کو شکایت ہے کہ چیمپئنز ٹرافی کے اکتوبر میں ہونے کی وجہ سے بھارتی ٹیم تھوڑی تعداد میں ٹیسٹ اور ایک روزہ میچوں کی میزبانی کر سکتا ہے۔

’ہم نے آئی سی سی کے ساتھ کوئی معاہدہ تو کیا نہیں ہوا جس کی وجہ سے ہم مستقبل میں کھیلنے کے پابند ہوں۔‘

بھارت اگلے تین سال اکتوبر میں آسٹریلوی ٹیم کی میزبانی کرنے کا ارادہ رکھتا ہے۔

اس سال چیمپئنز ٹرافی ٹورنامنٹ سات نومبر سے پانچ نومبر تک ہو رہا ہے۔ سن 2008 میں بھی ٹورنامنٹ انہیں تاریخوں میں ہو گا۔ اگر آسٹریلیا کے دورہ بھارت کے پروگرام کو حتمی شکل دے دی جاتی ہے تو ٹورنامنٹ دو بہترین ٹیموں سے محروم ہو جائے گا۔

یاد رہے کہ چیمپئنز ٹرافی کا اجراء سن 1998 میں کیا گیا تھا اور اس کا بنیادی مقصد آئی سی سی کے ترقیاتی منصوبوں کے لیے فنڈز اکٹھا کرنا تھا۔