لکشمن اس اننگز میں بھارت کی جانب سے نصف سنچری بنانے والے پانچویں بلےباز تھے

پاکستان اے کی جانب سے اوپنر عمران فرحت نے سنچری بنائی۔ وہ 107 رن بنا کر ہربھجن سنگھ کی گیند پر آؤٹ ہوئے۔ جب کھیل ختم ہوا تو فیصل اقبال 13 اور عاصم کمال 4 رن کے ساتھ کریز پر موجود تھے۔

دوسرے دن کا کھیل: تصاویر

پہلے دن کا کھیل: تصاویر

پاکستان اے کی ابتدائی دو وکٹیں جلد ہی گر گئی تھیں مگر اوپنر عمران فرحت نے حسن رضا کے ساتھ مل کر ٹیم کو مشکلات سے نکالا۔ حسن رضا 75 رن بنا کر عرفان پٹھان کی گیند پر آؤٹ ہوئے۔ پاکستان اے کے آؤٹ ہونے والے دیگر کھلاڑیوں میں بازید خان 6 اور محمد وسیم 1 رن بنا کر آؤٹ ہوئے۔

بھارت کی جانب سے عرفان پٹھان نے دو اور اجیت اگرکر اور ہربھجن سنگھ نے ایک، ایک وکٹ حاصل کی۔

اس سے قبل بلے بازوں کی شاندار بلے بازی کی بدولت بھارت نے کھانے کے وقفے پر سات وکٹ کے نقصان پر چار سو چودہ رن بنا کر اننگز ختم کرنے کا اعلان کر دیا تھا۔

بھارت کی جانب سے ابتدائی چھ بلے بازوں نے نصف سنچریاں سکور کیں۔ بھارتی ٹیم میں سب سے زیادہ سکور سچن تندولکر نے بنایا۔ وہ میچ کے پہلے دن 74 رن بنا کر یاسر عرفات کی گیند پر وکٹ کیپر ذوالقرنین حیدر کے ہاتھوں کیچ ہوئے تھے۔

کھیل کے دوسرے دن بھارت نے دو سو اٹھانوے رن چار کھلاڑی آؤٹ پر اننگز دوبارہ شروع کی اور یوراج سنگھ اور وی وی ایس لکشمن نے پر اعتماد انداز سے کھیلتے ہوئے اپنی ٹیم کے سکور کو 357 تک پہنچا دیا۔ اس موقع پر وی وی ایس لکشمن ریٹائر ہو گئے۔ انہوں نے نو چوکوں کی مدد سے 54 رن بنائے۔

لکشمن کی جگہ مہندر دھونی کھیلے کے لیے آئے۔ دھونی اور یوراج نے تیزی سے بینٹنگ کی اور جب بھارت کا سکور 390 پر پہنچا تو یوراج سنگھ بھی نو چوکوں کی مدد سے اناسی گیندوں پر انسٹھ رن بنا کر ریٹائر ہو گئے۔

مہندر دھونی بائیس گیندوں پر بائیس رن بنا کر محمد ارشاد کی گیند پر آؤٹ ہوئے۔ جب بھارت نے 414 کے مجموعی سکور پر اننگز ختم کرنے کا اعلان کیا تو عرفان پٹھان آٹھ اور اجیت اگرکر چار رن پر ناٹ آؤٹ تھے۔

پاکستان کی جانب سے محمد ارشاد نے دو جبکہ یاسر عرفات، عمر گل اور عمران فرحت نے ایک، ایک وکٹ حاصل کی۔

پاکستان اے: عمران فرحت، فیصل اقبال، محمد وسیم، حسن رضا، بازید خان، عاصم کمال، ذوالقرنین حیدر، محمد ارشاد، راؤ افتخار، منصور امجد، عمر گل، یاسر عرفات

بھارت: گوتم گمبھیر، وسیم جعفر، راہول ڈراوڈ، سچن تندولکر، وی وی ایس لکشمن، یوراج سنگھ، مہندر دھونی، عرفان پٹھان، اجیت اگرکر، ہربھجن سنگھ، ظہیر خان، ردرا پرتاپ سنگھ