منا رانا بی بی سی اردو ڈاٹ کام لاہور

	انڈیا کی ٹیم پانچ جنوری کو پاکستان پہنچے گی۔

سات سے نو جنوری کو پاکستان اے کے خلاف تین روزہ وارم اپ میچ کھیلے گی۔
پاک بھارت ٹیسٹ سیریز کا پہلا ٹیسٹ میچ تیرہ سے سترہ جنوری تک قذافی سٹیڈیم لاہور میں کھیلا جائے گا۔

دوسرا ٹیسٹ میچ اقبال سٹیڈیم فیصل آباد میں اکیس سے پچیس جنوری تک ہو گا جبکہ تیسرا اور آخری ٹیسٹ میچ نیشنل سٹیڈیم کراچی میں انتیس جنوری سے دو فروری کو کھیلا جائے گا۔

پاکستان اور بھارت کے درمیان ایک روزہ سیریز کا آغاز چھ فروری سے ہو گا۔
پہلا ایک روزہ میچ ارباب نیاز سٹیڈیم میں چھ فروری کو ہو گا یہ میچ دن میں ہی کھیلا جائے گا۔

پہلے ایک روزہ کے بعد عاشورۂ محرم کے سبب چار روز تک کوئی میچ نہیں ہو گا۔
دوسرا ایک روزہ راولپنڈی میں گیارہ فروری کو منعقد کیا جائے گا یہ میچ بھی دن ہی میں ہو گا۔ تیسرا ایک روزہ میچ قذافی سٹیڈیم لاہور میں تیرہ فروری کو ہو گا۔ یہ میچ یہ ڈے اینڈ نائٹ ہو گا۔

پاک بھارت سیریز کا چوتھا ایک روزہ میچ ملتان کرکٹ سٹیڈیم میں سولہ فروری کو ہو گا۔ پاکستان کرکٹ بورڈ کے مطابق ملتان سٹیڈیم میں اکتیس جنوری تک فلڈ لائٹس لگ جائیں گی لہذا یہ میچ بھی ڈے اینڈ نائٹ ہو گا۔

پانچواں ایک روزہ نیشنل کرکٹ سٹیڈیم کراچی میں انیس فروری کو ہوگا اور اسی دن رات کو بھارت کی کرکٹ ٹیم واپس اپنے ملک روانہ ہو جائے گی یہی وجہ ہے کہ کراچی میں فلڈ لائٹس ہونے کے باوجود میچ دن میں کھیلا جائے گا تاکہ بھارتی ٹیم آسانی سے واپس جا سکے۔

پاکستان کرکٹ بورڈ کے ڈائریکٹر کرکٹ آپریشن سلیم الطاف کا کہنا ہے کہ شیڈیول میں یہ تبدیلی نا گزیر تھی کیونکہ عاشورہ محرم کی وجہ سے پولیس فورس دستیاب نہیں تھی اور کرکٹ بورڈ بھارتی ٹیم کی سیکیورٹی پر کوئی رسک نہیں لے سکتاـ

سلیم الطاف نے کہا کہ یہ شیڈول بھارتی کرکٹ بورڈ کی رضا مندی سے طے ہوا ہے ۔

پی سی بی کے میڈیا ڈائریکٹر میڈیا عباس زیدی کے مطابق بھارتی ٹیم کی سیکیورٹی کے تمام انتظامات مکمل ہیں اور وزارتِ داخلہ ہم سے پوری طرح تعاون کر رہی ہے۔