ہربھجن نے سری لنکا کے خلاف ہوم سیریز میں اچھی کاکردگی کا مظاہرہ کیا ہے

ان کا کہنا تھا کہ ’ دونوں ممالک کے درمیان پاکستان میں ہونے والی آخری سیریز بھارت نے جیتی تھی اور اب پاکستان پر بہت دباؤ ہو گا کہ اس مرتبہ ایسا نہ ہو‘۔

ہربھجن کا یہ بھی کہنا تھا کہ’ ہماری کارکردگی میں نئے کوچ گریگ چیپل کی رہنمائی کی وجہ سے بہت بہتری آئی ہے اور کھلاڑیوں کے باہمی اتفاق میں بھی اضافہ ہوا ہے‘۔ انہوں نے کہا کہ ’انگلینڈ کو ٹیسٹ سیریز میں شکست دینے کے بعد پاکستانی ٹیم کےحوصلے بلند ہیں مگر بھارتی ٹیم میں انہیں شکست دینے کی قابلیت ہے‘۔

انہوں نے یہ بھی کہا کہ اس سیریز کے دوران دباؤ چند کھلاڑیوں پر نہیں بلکہ مجموعی ٹیم پر ہو گا۔ ان کا کہنا تھا کہ ’صرف سورو گنگولی پر ہی نہیں بلکہ ہر کھلاڑی پر دباؤ ہو گا کہ وہ اس سیریز میں اچھی کارکردگی دکھائیں‘۔

تیز پچوں کی تیاری کی اطلاعات پر ہربھجن نے کہا کہ’ یہ خبریں ہیں کہ سیریز کے لیے تیز پچیں تیار کی جا رہی ہیں اور ہم اپنی اصل حکمتِ عملی پچ دیکھ کر ہی تیار کریں گے‘۔

یاد رہے کہ ہربھجن سنگھ زخمی ہونے کی وجہ سے گزشتہ برس پاکستان کا دورہ کرنے والی بھارتی ٹیم میں شامل نہیں تھے۔