اشعر رحمٰن لاہور

	پاکستان کے فیلڈرز نے بھی کیون پیٹرسن کا خاصا ساتھ دیا

پیٹرسن نے حال ہی میں آسٹریلیا کے خلاف انتہائی اچھی کارکردگی کا مظاہرہ کیا تھا اور وہ بھی اینڈریو فلنٹوف کی طرح عوام کے پسندیدہ کھلاڑی ہیں۔ پاکستانی شائقین جہاں جہاں جیتنے کے خواہشمند ہیں وہیں اپنے پسندیدہ کھلاڑیوں کا کھیل بھی دیکھنا چاہتے ہیں۔ اس لیے جہاں این بیل کی اپنی ٹیم کے لیے انتہائی ذمہ داری سے کھیلی گئی باری پاکستانی شائقین کے لیے انتہائی تکلیف دہ تھی وہیں پیٹرسن کی بیٹنگ لوگوں کو پسند آئی۔

پاکستانی ٹیم کھیل کے تیسرے روز خاصی بجھی بجھی نظر آئی۔ اس کی وجہ بظاہر کھیل کے دوسرے روز پیش آنے والا وہ واقعہ ہے، جس کے نتیجے میں شاہد آفریدی پر ایک ٹیسٹ اور دو ون ڈے میچ کھیلنے پر پابندی عائد کی گئی ہے۔پتہ نہیں کیوں، پاکستان کے کھلاڑی اس چیز کے انتہائی خلاف ہیں جسے انگریزی میں مورل ہائی گراؤنڈ moral high ground کہا جاتا ہے۔

ابھی لوگ انگلستان کے کھلاڑیوں کی ان سپورٹنگ unsporting حرکتوں کا ذکر ہی کر رہے تھے کہ یہ خبر آ گئی کے وہی آفریدی جن کی دھواں دار بلے بازی کا ہم ابھی ڈھول پیٹ چکے ہیں پچ پر کارروائی کرتے ہوئے رنگے پاؤں پکڑے گئے۔ ان کی اس حرکت کی کوئی توجیہہ ہمارے پاس نہیں ہے۔

	انضمام کے آؤٹ ہونے کے فیصلے کا پاکستان کے تمام کھلاڑیوں کو افسوس تھا

آفریدی کو کچھ افسوس شاید اپنے آؤٹ ہونے کا بھی تھا۔ اگر کوئی بہت ہی ضد پر آ جائے تو اس کے لیے ٹی وی کے ری پلے کے ساتھ یہ ثابت کرنا کچھ اتنا مشکل نہیں ہو گا کہ ٹریسکو تھک نے آفریدی کا کیچ اتنی صفائی سے نہیں لیا تھا اور اگر آفریدی، ٹریسکوتھک سے ناراض تھے تو ان کے غصے میں اس وقت مزید اضافہ ہوا ہو گا جب ٹریسکوتھک نے امپائروں کی توجہ پچ پر موجود ان نشانات کی طرف مبذول کرائی جو شواہد کے مطابق آفریدی نے اپنے پیر کو گھما گھما کر ثبت کیے تھے۔ ہم نے پیر میں چکر کے بارے میں تو سنا تھا ان ’چکروں‘ کا ہمیں پتہ نہیں تھا۔

اس تمام غصے کی سزا پاکستانی ٹیم اور شائقین کو تین میچوں میں آفریدی کی عدم موجودگی کی شکل میں بھگتنا ہو گی۔ ایک میچ میں آفریدی کو کپتان اور کوچ نے باہر بٹھا دیا اور ایک میں وہ خود باہر بیٹھ گئے۔ بات پھر وہیں آ جاتی ہے کہ اگر کھیل انٹرٹینگ نہیں ہوگا تو پھر ٹیسٹ میچ دیکھنے کون آئے گا؟

مسئلہ یہ ہے کہ جو جوش کے ساتھ کھیلتے ہیں وہ اکثر غلط موقعوں پر جذباتی پن دکھا جاتے ہیں۔ آفریدی نے سیریز کے شروع میں کہا تھا کہ وہ پاکستان کے فلنٹوف کے طور پر ابھرنا چاہتے ہیں۔ اگر واقعی وہ یہ چاہتے ہیں تو پھر انہیں فلنٹوف سے وہ سب کچھ سیکھنا چاہیے جو فلنٹوف نے برسوں میں سیکھا ہے۔

	پاکستانی ٹیم اور تماشائیوں کو ان ایک ٹیسٹ اور دو ایک روزہ میچوں میں عمر آفرید کی کمی محسوس ہو گی

پیٹرسن میں بے انتہا ٹیلنٹ ہے مگر فی الحال ان کے پاس سٹروکس، اور خاص طور پر آف سائیڈ سٹروکس اور صبر کی کمی ہے۔ آفریدی کی طرح ان کے ہاتھ میں بھی طاقت ہے اور مزہ ہے۔ پاکستانی پچوں پر اچھی کارکردگی یقیناً ان کی بیٹنگ میں نکھار پیدا کرے گی۔