آسٹریلیا نے ورلڈ الیون کو شکست دے کر ورلڈ سیریز ٹورنامنٹ جیت لیا

ورلڈ الیون کو 293 رنز کا ہدف ملا لیکن ساری ٹیم اٹھائیسویں اوور میں صرف 137 رنز بنا کر آؤٹ ہو گئی۔

آئی سی سی ورلڈ الیون کو ملبورن کے ٹیلسٹرا ڈوم میں دوسری مرتبہ شکست کا سامنا کرنا پڑا۔

بریٹ لی نے تیس رنز دے کر چار کھلاڑیوں کو آوٹ کیا۔اس سے پہلے مائیکل ہسے اور شین واٹسن آسٹریلیا کودو سو ترانوے کے ناقابل شکست اسکور پر لے گئے۔

ورلڈ الیون کی تمام ٹیم ایک سو سینتیس رنز بنا کر آوٹ ہو گئی جس میں وریندر سہواگ کے سینتیسں رنز شامل ہیں۔

آسٹریلیا کے کپتان رکی پونٹنگ نے مسلسل تیسری مرتبہ ٹاس جیت کر پہلے بیٹنگ کا فیصلہ کیا۔

فاسٹ باؤلر ماکایا نیتنی نے پہلے اوور میں اپنی پہلی وکٹ اس وقت حاصل کی جب مائیکل کلارک جو سائمن کاٹیج کے زخمی ہونے کے باعث اوپنگ بیٹسمین کے طور پر کھیل رہے تھے، ایل بی ڈبلیو ہوئے۔

پونٹنگ جو انیس کے اسکور پر کھیل رہے تھے انہیں بھی نیتی نے ایل بی ڈبلیو کرنے کی اپیل کی لیکن امپائر علیم ڈار نے پونٹنگ کو آوٹ قرار نہیں دیا۔پونٹنگ بالاخر اڑسٹھ کے اسکور پر آوٹ ہوئے۔

اس کے بعد ہسے اور واٹسن بھی بالترتیب پچھتر اور سڑسٹھ رنز بنا کر آوٹ ہوئے۔ دونوں نےایک سو پچپن رنز کی شراکت قائم کی۔

	ورلڈ الیون کی پوری ٹیم ایک سو سینتیس رنز سے زیادہ نہیں بنا سکی

اس کے جواب میں ورلڈ الیون کی ٹیم نے کھیل کی ابتداء اچھی نہیں کی۔ لی نے اپنے پہلے اوور کی دوسری گیند پر کیلس اور لارا کو آوٹ کرنے کے بعد ہیٹ ٹریک کرتے ہوئے اپنی تیسری گیند پر کرس گیل کو آوٹ کر دیا۔

فلنٹاف اور سہواگ نے ساٹھ رنز کی شراکت قائم کرنے کی کوشش کی لیکن واٹسن نے انہیں زیادہ دیر تک کریز پر نہیں رہنے دیا۔

ان دونوں کے بعد آنےوالے بلے باز بھی یکے بعد دیگرے بڑی آسانی سے آوٹ ہوگئے اور اس طرح پوری ٹیم اٹھائیسویں اوور میں شکست سے دوچار ہو گئی۔

آسٹریلیا کی ٹیم: رکی پونٹنگ (کپتان)، ایڈم گلکرسٹ، ڈیمئن مارٹن، مائیکل ہسے، مائیکل کلارک، شین واٹسن، اینڈریو سمنڈز، کیمرون وائٹ، بریٹ لی، گلین میگرا، ناتھن بریکن۔

ورلڈ الیون: شان پولاک (کپتان)، وریندر سہواگ، کمار سنگاکارا، راہول ڈراوڈ، ژاک کیلس، برائن لارا، کیون پیٹرسن، اینڈریو فلنٹوف، ڈینئل ویٹوری، شعیب اختر اور کرس گیل۔