ہارون رشید بی بی سی اردو ڈاٹ کام، پشاور

	پاکستان کرکٹ بورڈ سرحد اور فاٹا میں کرکٹ کھیلنے کے لیے سہولتیں فراہم کرے گا

پاکستان کرکٹ بورڈ کے سربراہ شہریار خان کا صوبہ سرحد اور اس سے ملحق قبائلی علاقے خیبر ایجنسی کے دو روزہ دورے کا مقصد یہاں پر نوجوانوں کو دستیاب سہولیات کا جائزہ لینا تھا۔

اس سلسلے میں پی سی بی کے سربراہ نے خود قبائلی علاقے خیبر ایجنسی میں جمرود اور لنڈی کوتل کے علاوہ کوہاٹ میں سٹیڈیمز کا دورہ کیا اور سہولتوں کا جائزہ لیا اور بورڈ کی جانب سے امداد کا اعلان بھی کیا۔

انہوں نے ہفتے کے روز ارباب نیاز سٹیڈیم کا دورہ کیا اور وہاں کھلاڑیوں کو میسر سہولیات کا جائزہ لیا۔

اس موقع پر صحافیوں سے بات چیت کرتے ہوئے ان کا کہنا تھا کہ کرکٹ کے فروغ کے لئے ضروری ہے کہ صوبہ سرحد اور فاٹا میں بنیادی ڈھانچہ تیار کیا جائے۔ ان کا کہنا تھا کہ ٹیلنٹ کی صوبہ سرحد اور قبائلی علاقوں میں کمی نہیں جس کی وجہ سے پشاور کی ٹیم قومی چیمپین ہے، انڈر نائنٹین کے چیپمیئن رہے ہیں اور سکولوں کے بھی چیمپین ہیں۔ ضرورت صرف انہیں مناسب سہولیات دینے کی ہے۔

صوبہ سرحد کے مبصرین نے بورڈ کے چیئرمین کی ذاتی دلچسپی کا خیرمقدم کیا ہے اور توقع ظاہر کی ہے کہ اس سے اس کھیل کو یہاں مزید فروغ ملے گا اور مستقبل میں قومی سطح پر اچھے کھیلاڑی مل سکیں گے۔