عبدالرشید شکور
بی بی سی اردو ڈاٹ کام ، کراچی |  |
|  پہلی سیریز دو سال قبل پاکستان میں کھیلی گئی تھی۔ |
پاکستان اور بھارت 9 سے 11 جون تک کراچی میں ہونے والی سنوکر ٹیسٹ سیریز میں مدمقابل ہیں۔ یہ اس سلسلے کی تیسری سنوکر سیریز ہے۔ پہلی سیریز دو سال قبل پاکستان میں کھیلی گئی تھی جو پاکستان نے جیتی تھی جبکہ گزشتہ سال بھارت نے اپنے یہاں کھیلی گئی سیریز جیتی تھی۔ دونوں ملکوں کے درمیان کھیلی جانے والی اس تیسری سیریزمیں بھی صف اول کے کیوسٹس حصہ لیں گے جن میں پاکستان کی جانب سے سابق عالمی اور ایشین چیمپئن محمد یوسف، صالح محمد، نوین پروانی اور عمران شہزاد شامل ہیں۔ بھارت نے اس سیریز کے لئے سابق عالمی چیمپئن پنکج ایڈوانی ایشین چیمپئن الوک کمار دویندرا جوشی اور مانک چندرا کا انتخاب کیا ہے۔ اس سیریز کا فارمیٹ پچھلی سیریزکی طرح ہے جس میں ہر روز دو ڈبلز مقابلے اورچار سنگلز مقابلے ہونگے جبکہ لکی سیون کی بنیاد ایک فریم کا میچ بھی کھیلا جائے گا اور مجموعی پوائنٹس کی بنیاد پر فاتح ٹیم کا فیصلہ کیا جائے گا۔ سیریز جیتنے والی ٹیم دو لاکھ روپے کی انعامی رقم کی حقدار ٹھہرے گی جبکہ رنراپ کو ایک لاکھ روپے ملیں گے۔ پاکستان اور بھارت کے درمیان سنوکر رابطے نئے نہیں ہیں گزشتہ کئی برسوں سے دونوں ملکوں کے کھلاڑی ایک دوسرے کے یہاں ہونے والے مقابلوں میں باقاعدگی سے حصہ لیتے رہے ہیں ۔ پاکستان کےمحمد یوسف اور صالح محمد آئندہ ماہ بھارت کے شہر پونا میں ہونے والی ایشین سنوکر چیمپئن شپ میں شرکت کرینگے۔ | 
یہ صفحہ دوست کو ای میل کیجیئے
پرِنٹ کریں
