جونز سابق ٹیسٹ بلےباز ہیں

ایک بھارتی اخبار نے ڈین جونز کے حوالے سے لکھا ہے کہ ’میں اٹھاون مرتبہ بھارت جا چکا ہوں۔ مجھے یہ ملک بھی پسند ہے اور وہاں کے لوگ بھی دلچسپ۔۔۔ مجھے واقعی دلچسپی ہے (کوچ بننے میں)۔‘

چند روز پہلے ذرائع ابلاغ کے حوالے سے یہ خبریں بھی سننے میں آتی رہی ہیں کہ ویسٹ انڈیز کے سابق کپتان سر ویویئن رچرڈز کو بھارتی کرکٹ ٹیم کا کپتان مقرر کیا جا رہا ہے۔

بھارتی ٹیم کے موجودہ کوچ نیوزی لینڈ کے جان رائٹ کی طرف سے مستعفی ہونے کے اعلان کے بعد بی سی سی آئی نے ٹیم کے لیے نئے کوچ کے انتخاب کی کوششوں کا آغاز کر دیا ہے۔

جان رائٹ نے ساڑھے چار برس تک بھارتی کرکٹ ٹیم کے کوچ کے فرائض انجام دیئے اور پاکستان کے ساتھ ہونے والی حالیہ سیریز کے بعد مستعفی ہو گئے۔

نئے کوچ کی تقرری کے سلسلے میں گریگ چیپل، دیؤ واٹمور، جیف مارش، ٹام موڈی اور سر ویویئن رچرڈز کا نام لیا جاتا رہا ہے لیکن اب اس بات پر بھی غور جاری ہے کہ کیا سٹیو وا بھی اس عہدے میں دلچسپی رکھتے ہیں یا نہیں؟

تاہم ڈین جونز کا خیال ہے کہ اگر انہیں بھارتی ٹیم کی کوچنگ سونپی جائے تو وہ خاصے کارآمد ثابت ہو سکتے ہیں۔