گیند کو زور دار ہٹ لگانے میں مشہور رکی پونٹنگ

ایم سی سی جسے کرکٹ کے قوانین بنانے والا ادارہ کہا جاتا ہے ، آسٹریلیا کے کپتان رکی پونٹنگ کے بیٹ کے متعلق تحقیق کر رہا ہے کہ آیا وہ کرکٹ کے قوانین کے مطابق ہے۔

رکی پونٹنگ نے کہا کہ ان کو اپنے زیر استعمال بلے کے بارے میں تحقیقات کا سن کر ہنسی آئی ۔ انہوں نے کہا کہ جس بلے کے بارے میں تحقیق ہو رہی ہے وہ پانچ چھ سال سے ان کے زیر استعمال ہے۔

رکی پونٹنگ نے کہا ہے کہ تبدیلی صرف اتنی آئی ہے کہ اب بلے کا سٹگر تبدیل کیا گیا ہے اور ان کو معلوم نہیں کہ یہ تحقیق کیسے شروع ہوئی۔

دی مارلیبون کرکٹ کلب (ایم سی سی) اس بات کی تحقیق کرے گا کہ آیا پونٹنگ کا سکہ چڑھا بیٹ کرکٹ کے ان قوانین کے مطابق ہے جو بیٹ کے بلیڈ کی ساخت اور اس پر چڑھے مٹیریل سے متعلق ہوتے ہیں۔

ایم سی سی اس بات کی بھی تسلی کرنا چاہتا ہے کہ بلے کا ڈیزائن کرکٹ کے قوانین کے مطابق ہے اور اس سے کرکٹ کی گیند کو تو کوئی نقصان نہیں پہنچتا۔

ایم سی سی نے کہا اس نے ابھی تک بیٹ کی طاقت کے بارے میں کوئی اندازہ نہیں لگایا ہے

پونٹنگ کوکابورا کمپنی کا بنایا ہوا بیٹ استعمال کرتے ہیں لیکن ایم سی سی کا کہنا ہے کہ یہی کمپنی انگلینڈ اور آسٹریلیا کے کئی دوسرے کھلاڑیوں کو یہ بیٹ فراہم کرتی ہے۔

پونٹنگ گیند کو زبردست ہٹ لگانے والے ایک بہترین کھلاڑی ہیں۔ انہوں نے ٹیسٹ میچوں میں چھپن اعشاریہ پانچ کی اوسط سے 6950 رنز بنائے ہیں۔