عبدالرشید شکور بی بی سی اردو ڈاٹ کام، بنگلور

انضمام الحق اور یونس خان نے ذمہ داری سے بیٹنگ کی اور ٹیم کو مشکلات سے نکالا۔

پاکستان کی جانب سے انضمام الحق اور یونس خان نے سنچریاں بنائیں۔ انضمام الحق نے اپنے سوویں ٹیسٹ میں کیرئیر کی اکیسویں سنچری بنائی۔ وہ 184 رن پر کھیل رہے ہیں جبکہ یونس خان نے 127 رن بنائے ہیں۔

ان دونوں بلے بازوں کی شراکت میں ابھی تک 316 رن بنے ہیں جو کہ بنگلور میں پاکستان کی جانب سےکسی بھی وکٹ کی لیے طویل ترین پارٹنرشپ ہے۔

سوویں ٹیسٹ میں سنچری بنانے پر سٹیڈیم میں موجود تماشائیوں نے پاکستانی کپتان کو کھل کر داد دی۔

پاکستان کو پہلے روز ابتدا ہی میں نقصان اٹھانا پڑا جب شاہد آفریدی بالا جی کی گیند پر راہول ڈریوڈ کے ہاتھوں کیچ ہو ئے۔ اس وقت پاکستان کا سکور صرف 4 رن تھا۔ ان کی جگہ یونس خان کھیلنے کے لیے آئے۔

آفریدی کے بعد پاکستان کے دوسرے اوپنر یاسر حمید صرف 6 رن پر عرفان پٹھان کی گیند پر وکٹ کیپر کارتھک کے ہاتھوں کیچ ہو گئے۔ جس کے بعد پاکستان کی جانب سے کپتان انضمام الحق اور نائب کپتان یونس خان نے ذمہ داری سے بیٹنگ کی اور ٹیم کو مشکلات سے نکالا۔

پاکستان اور بھارت کے درمیان بدھ سے بنگلور کے چنا سوامی سٹیڈیم میں شروع ہونے والے تیسرے اور آخری ٹیسٹ کا ٹاس انضمام الحق نے جیتا اور پہلے بیٹنگ کا فیصلہ کیا۔

یہ ٹیسٹ پاکستانی کپتان انضمام الحق کا سوواں ٹیسٹ بھی ہے۔

پاکستانی ٹیم میں توفیق عمر اور محمد خلیل کی جگہ یاسرحمید اور ارشد خان کو شامل کیا گیا ہے۔ بھارتی ٹیم کسی تبدیلی کے بغیر میدان میں اتری ہے۔

اس سے پہلے ہونے والے دو ٹیسٹوں میں سے پہلا موہالی ٹیسٹ ہار جیت کے فیصلے کے بغیر ختم ہو گیا تھا جب کے دوسرا کولکتہ ٹیسٹ بھارت نے ایک سو پچانوے رنز سے جیت لیا تھا۔

بنگلور ٹیسٹ کے لیے دونوں ٹیمیں یہ ہیں:

پاکستان: انضمام الحق ( کپتان ) یاسرحمید شاہد آفریدی یونس خان یوسف یوحنا عاصم کمال عبدالرزاق کامران اکمل محمد سمیع ارشد خان اور دانش کنیریا

بھارت: سوروگنگولی( کپتان) گوتم گمبھیر وریندرسہواگ راہول ڈراوڈ سچن ٹنڈولکر وی وی ایس لکشمن دنیش کارتھک عرفان پٹھان بالاجی انیل کمبلے اور ہربھجن سنگھ

امپائرز: آسٹریلیا کے سائمن ٹافل اور نیوزی لینڈ کے بلی باؤڈن ہیں۔
میچ ریفری انگلینڈ کے کرس براڈ ہیں۔