عبدالرشید
شکور بی بی سی اردو ڈاٹ کام کولکتہ |  |
|  شاہد آفریدی کی صورت میں ایک اضافی بولر بھی ٹیم کو میسر آجائے گا |
پاکستانی کرکٹ ٹیم بدھ سے بھارت کے خلاف دوسرے ٹیسٹ میں ایک ایسے میدان پر مدمقابل ہے جس سے اس کی خوشگوار یادیں وابستہ ہیں۔ لیکن کپتان انضمام الحق کہتے ہیں کہ ماضی کی یہ کامیابیاں آپ کی اگلی جیت کے لیے ہمت افزائی کا سبب تو بن سکتی ہیں لیکن اس کے لیے غیرمعمولی کارکردگی دکھانا ضروری ہے۔ پاکستانی ٹیم نے ایڈن گارڈنز پر پانچ ٹیسٹ کھیلے ہیں جن میں سے چار ڈرا ہوئے ہیں اور1999 میں اس نے بھارت کو ایشین ٹیسٹ چیمپئن شپ کے میچ میں شکست دی تھی جبکہ ون ڈے میں نہرو کپ فائنل، سلیم ملک اور سلمان بٹ کی شاندار بیٹنگ کے بل پر اس نے تین یادگار کامیابیاں اپنے نام کی ہیں۔ انضمام الحق جو پہلی مرتبہ ایڈن گارڈنز میں ٹیسٹ کھیل رہے ہیں کہتے ہیں کہ موہالی ٹیسٹ نے یقیناً ٹیم کے حوصلے بلند کیے ہیں لیکن کھلاڑیوں کو تساہل سے بچنا ہوگا۔
|  شاہد آفریدی کے ٹیم میں شمولیت کے امکان ہیں |
وکٹ کے بارے میں انضمام الحق کا کہنا ہے کہ اس پر گھاس ہے لیکن دو دن کے بعد یہ اسپن لے گی ابتدا میں تیز بولرز کو درست لینتھ اور لائن پر بولنگ کرنی ہوگی۔ رانا نویدالحسن کندھے کی تکلیف میں مبتلا ہیں۔ شاہد آفریدی کو سلمان بٹ کی جگہ ٹیم میں شامل کرکے انضمام الحق کو ایک اضافی اسپنر بھی مل جائے گا جبکہ رانا کی جگہ محمد خلیل کی شمولیت کا امکان ہے۔انضمام الحق پہلے ٹیسٹ کی دونوں اننگز میں مایوس کن بیٹنگ کے باوجود نائب کپتان یونس خان کو ٹیم سے ڈراپ کرنے کے لیے تیار نہیں ہیں۔ پاکستانی کپتان کامران اکمل کی کارکردگی سے بہت خوش ہیں اور ان کا کہنا ہے کہ اس نے بیٹنگ کے ذریعے بھی ٹیم کو بہت حوصلہ دیا ہے۔
ب
ولنگ کوچ کے بارے میں کیے گئے سوال پر انضمام الحق نے ہنستے ہوئے کہا کہ موہالی ٹیسٹ کے بعد یہ کہا جائے گا کہ ٹیم کو فیلڈنگ کوچ کی بھی ضرورت ہے۔ دراصل کوچ باب وولمر اپنا کام بہترانداز میں کررہے ہیں۔
|  انضمام کامران اکمل کی کارکردگی سے مطمئن ہیں |
بھارتی کپتان سوروگنگولی موہالی ٹیسٹ نہ جیتنے پر افسردہ ہیں ان کا کہنا ہے کہ میچ بھارت کو جیتنا چاہئے تھا۔گنگولی جن کا یہ ہوم گراؤنڈ ہے کہتے ہیں کہ وکٹ پر گھاس ہے جس پر آف اسپنر ہربھجن سنگھ کو کھلانے کا فیصلہ سوچ سمجھ کر کیا جائے گا۔ وہ نہیں سمجھتے کہ بارش اس میچ پر اثرانداز ہوسکتی ہے۔ محکمہ موسمیات نے بدھ کو بارش کی پیش گوئی کی ہے۔ گنگولی کا کہنا ہے کہ یہ تاثر درست نہیں کہ موہالی میں سہواگ کے سوا باقی بیٹسمین آہستہ کھیلے۔ پاکستانی ٹیم کے بارے میں وہ کہتے ہیں کہ نوجوان ٹیم ہے جس میں بڑا ٹیلنٹ ہے۔ دانش کنیریا کے بارے میں گنگولی کا کہنا ہے کہ اس نے چھ وکٹیں حاصل ضرور کی ہیں لیکن اس نے ڈیڑھ سو رنز بھی دیے۔وہ بہت خطرناک نہیں ہے۔ ٹاس کے بارے میں گنگولی کا کہنا ہے کہ اس کی اہمیت بہت زیادہ نہیں ہوگی۔
گنگولی کا کہنا ہے کہ عرفان پٹھان اور ظہیرخان فٹ ہیں اور جرمانے کے بعد بالاجی کو محتاط رہنا ہوگا۔ بھارتی کپتان کو اس میدان پر سنچری بنانے کا شدت سے انتظار ہے وہ کہتے ہیں کہ اس کے لیے وہ سرتوڑ کوشش کررہے ہیں۔ | 
یہ صفحہ دوست کو ای میل کیجیئے
پرِنٹ کریں
