عبدالرشید شکور
بی بی سی اردو ڈاٹ کام، کراچی |  |
|  بکنر نے 1989 سے بھارت اور ویسٹ انڈیز کے ٹیسٹ سے اپنا کیریئر شروع کیا تھا |
ویسٹ انڈیز کے امپائر اسٹیو بکنر پاکستان اور بھارت کے درمیان 16 سے 20 مارچ تک کلکتہ میں کھیلے جانے والے دوسرے ٹیسٹ میں ایمپائرنگ کریں گے۔ یہ بحیثیت ایمپائر ان کا 100 واں ٹیسٹ ہوگا۔ وہ بحیثیت ایمپائر ٹیسٹ میچوں کی سنچری مکمل کرنے والے دنیا کے پہلے ایمپائر ہوں گے۔ 58 سالہ اسٹیو بکنر نے اپریل 1989 میں بھارت اور ویسٹ انڈیز کے درمیان ٹیسٹ سے اپنا کیریئر شروع کیا تھا اور اب وہ ایک اہم سنگ میل عبور کرنے کے قریب ہیں۔ آئی سی سی نے پاکستان اور بھارت کے درمیان ہونے والی ٹیسٹ اور ون ڈے سیریز کے امپائرز اور میچ ریفری کے ناموں کا اعلان کردیا ہے جس کے تحت اسٹیو بکنر موہالی میں 8 سے 12 مارچ تک ہونے والے پہلےٹیسٹ میں آسٹریلیا کے ڈیرل ہیئر کے ساتھ ایمپائرنگ کریں گے جبکہ16 سے 20 مارچ تک کلکتہ میں ہونے والے دوسرے ٹیسٹ میں وہ جنوبی افریقہ کے روڈی کرٹزن کے ساتھ ذمہ داری نبھائیں گے۔ 24 سے 28 مارچ تک بینگلور میں ہونے والے سیریز کے تیسرے ٹیسٹ کے امپائرز آسٹریلیا کے سائمن ٹافل اور نیوزی لینڈ کے بلی باؤڈن ہوں گے ۔ بلی باؤڈن اسوقت اپنی امپائرنگ کے سلسلے میں کڑی تنقید کی زد میں ہیں۔ آئی سی سی نے انگلینڈ کے کرس براڈ کو میچ ریفری مقرر کیا ہے۔ ون ڈے سیریز کے پہلے تین میچوں میں بلی باؤڈن اور بقیہ تین میچوں میں روڈی کرٹزن نیوٹرل امپائرز ہوں گے۔ | 
یہ صفحہ دوست کو ای میل کیجیئے
پرِنٹ کریں
