وارن اور مرلی کولمبو میں بچوں سے مل رہے ہیں

سونامی سے متاثرہ علاقے گال کا دورہ کرنے کے بعد شین وارن اور مرلی دھرن نے کولمبو میں سکول کے بچوں کو بولنگ کرنے کے مفید مشورے دیے۔

دنیا میں سب سے زیادہ ٹیسٹ وکٹ لینے والے بالر شین وارن نے کہا کہ وہ گال کی تباہی سے بہت متاثر ہوئے ہیں۔

انہوں نے کہا کہ ٹی وی پر تباہی دیکھنا اور بات ہے اور اپنی آنکھوں سے اسے دیکھنا اور بات۔

وارن نے گال کی گراؤنڈ پر گزشتہ سال مارچ میں دنیائے کرکٹ میں 500 وکٹ لینے والے پہلے کھلاڑی بننے کا اعزاز حاصل کیا تھا۔

وہ وارن کے لیے ناقابلِ فراموش لمحہ تھا کیونکہ ایک ممنوعہ دوا کے استعمال کے بعد ان کو 500 وکٹ پوری کرنے کے لیے ایک سال انتظار کرنا پڑا تھا۔

انہوں نے کہا کہ گال کی گراؤنڈ ایک خوبصورت ترین گراؤنڈ تھی اور اسے اس حالت میں دیکھنے سے دل کو بہت دکھ پہنچا ہے۔

وارن نے ابھی 120 ٹیسٹ میچوں میں 566 وکٹ حاصل کیے ہیں جبکہ مرلی دھرن نے 91 ٹیسٹ میچوں میں 532 شکار کیے ہیں۔

مرلی دھرن نے کہا کہ ’جب سونامی سے تباہی ہوئی تو وارن نے مجھے کہا کہ وہ کس طرح مدد کر سکتے ہیں۔ میں نے انہیں بتایا کہ ان کا یہاں آنا ہی کافی مددگار ثابت ہو سکتا ہے‘۔