شین وان کا انگوٹھا ٹوٹ گیا ہے۔

شین وارن کے دائیں ہاتھ کا انگوٹھا اس وقت ٹوٹ گیا جب وہ نیٹ پریکٹس کے دوران بیٹنگ کر رہے تھے۔

شین وارن نے کہا کہ وہ زخمی ہونے پر سخت مایوس ہوئے ہیں اور وہ بھارت کے خلاف ٹیسٹ سریز کا اختتام اچھے طریقے سے کرنا چاہتے تھے لیکن ایسا نہیں ہو سکا جس کا انہیں افسوس رہے گا۔

شین وارن کو جو ٹیسٹ کرکٹ میں سب سے زیادہ وکٹیں حاصل کرنے والے بالر ہیں، امید تھی کہ وہ ممبئی میں ہونے والے ٹیسٹ میں اپنی وکٹوں کی تعداد کو مزید بڑھا سکیں گے۔مبصرین کے مطابق ممبئی میں ہونے ٹیسٹ میں وکٹ سپن بولروں کو مدد کرے گی۔

شین وارن نے کہا بھارت کا دورہ اس کے کیریئر میں سب سے زیادہ اہمیت کا حامل ہے۔ انہوں نے کہا کہ ان کو یقین ہے کہ ان کی غیر موجودگی میں بھی آسٹریلیا کی ٹیم بھارت کے خلاف میچ جیتنے میں کامیابی حاصل کرنے کی اہل ہے۔

شین وارن کی کوشش ہے کہ وہ نیوزی لینڈ کے خلاف ہونے والی ہوم سیریز سے پہلے فٹ ہو جائیں۔ آسٹریلیا اور نیوزی لینڈ کے درمیان ٹیسٹ سیریز اٹھارہ نومبر سے شروع ہو رہی ہے۔

اس سے پہلے آسٹریلیا کے کپتان رکی پونٹنگ بھی انگلی میں فریکچر آنے کی وجہ سے بھارت کے خلاف تین ٹیسٹوں میں حصہ نہیں لے سکے ۔ رکی پونٹنگ اب مکمل طور پر فٹ ہو کر چوتھا میچ میں کھیلنے کے لیے تیار ہیں۔

آسٹریلیا بھارت کے خلاف چار میچوں کی سریز پہلے ہی جیت چکا ہے۔ پہلے اور تیسرے میچ میں آسٹریلیا نےبھارت کو واضح فرق سے ہرا دیا تھا۔ ایک ٹیسٹ میچ میں جس میں بھارت اچھی پوزیشن میں تھا پانچویں دن کا کھیل بارش کی نذر ہو گیا تھا جس کی وجہ سے میچ کا کوئی فیصلہ نہیں ہو سکا تھا۔