عبدالرشید شکور بی بی سی اردوڈاٹ کام، کولمبو

انضمام الحق کوئی کارکردگی نہ دکھا سکے

پاکستان کے 122 کے سکور کے جواب میں سری لنکا نے بتیسویں اوور میں تین وکٹوں کے نقصان پر ایک سو تئیس رنز بنائے۔

بنگلہ دیش اور ہانگ کانگ کی کمزور بولنگ کے خلاف رنز کے ڈھیر لگانے والے پاکستانی بیٹسمینوں کو سری لنکن بولنگ نے اپنے حصار میں لیتے ہوئے صرف122 رنز پر محدود کردیا۔

ٹاس جیت کر پہلے بیٹنگ کا فیصلہ کرنے والے انضمام الحق کے لئے وہ منظر سوہان روح تھا جب وکٹیں خزاں کے پتوں کی طرح وقفے وقفے سے گرتی رہیں۔

پاکستان نے عمران فرحت کی جگہ عمران نذیر کو یاسرحمید کے اوپنر پارٹنر کے طور پر منتخب کیا لیکن وہ صرف 14 رنز بنا کر زویزا کی گیند پر جے وردھنے کے ہاتھوں کیچ ہوگئے۔ ہانگ کانگ کے خلاف میچ کے سنچری میکر شعیب ملک کو بھی4 رنز پر زویزا نے تلکارتنے دلشن کے ہاتھوں کیچ آؤٹ کر دیا۔

پاکستان ٹیم اسوقت شدید مشکل سے دوچار ہوگئی جب ایک ہی اوور میں کپتان انضمام الحق اور نائب کپتان یوسف یوحنا پویلین کی راہ دیکھنے پر مجبور ہوگئے۔

انضمام الحق کو9 رنز پر مرلی دھرن نے بولڈ کیا اور یوسف یوحنا بغیرکوئی رن بنائے رن آؤٹ ہوگئے۔ اسوقت پاکستان کا اسکور 46 رنز تھا اور اس کی4 وکٹیں گرچکی تھیں۔

یونس خان کو ایک رن پر معروف نے جے وردھنے کے ہاتھوں کیچ کرایا تو51 رنز5 کھلاڑی آؤٹ کا اسکور پاکستان بیٹنگ لائن کی مکمل تباہی کی کہانی بیان کر رہا تھا۔

ستم بالائے ستم اوپنر یاسرحمید اپل چندانا کی تھرو پر رن آؤٹ ہوگئے۔

معین خان اور عبدالرزاق سے ٹیم کو مشکل صورتحال سے نکالنے کی امید بر نہ آسکی۔ معین خان کی اننگز کا خاتمہ 3 رنز پر زویزا نے کیا۔یہ طویل قامت زویزا کی تیسری وکٹ تھی۔

پاکستان اننگز کی سب سے بڑی 32 رنز کی شراکت عبدالرزاق اور محمد سمیع کے درمیان رہی۔ عبدالرزاق 43 رنز بناکر معروف کی گیند پر دلشن کے ہاتھوں کیچ ہوئے۔ سمیع کو جے سوریا نے بولڈ کیا۔ آؤٹ ہونے والے آخری بیٹسمین شعیب اخترتھے جو ایک رن پر آؤٹ ہوئے۔

سری لنکا کی طرف سے زویزا تین وکٹوں کے ساتھ سب سے کامیاب بالر رہے۔