پاکستان کے آخری آؤٹ ہونے والے کھلاڑی دانش کنیریا تھے جنہیں سچن تیندولکر نے آؤٹ کیا۔ عاصم کمال نے نصف سنچری بنائی اور ناٹ آؤٹ رہے۔

بھارت کے سب سے کامیاب بالر انیل کمبلے تھے جنہوں نے چار کھلاڑی آؤٹ کئے۔

شعیب اختر، فضلِ اکبر،محمد سمیع اور یوسف یوحنا کو کمبلے نے آؤٹ کیا تھا۔ یوحنا نے اڑتالیس رنز بنائے۔

چوتھے روز کے کھیل کے آغاز پر ہی میزبان ٹیم کو نقصان اٹھانا پڑا جب بالا جی نے کامران اکمل کو بولڈ کر دیا۔

اس کے چند ہی اوور بعد یاسر حمید بیس کے سکور پر اشیش نہرا کی گیند پر وِکٹ کیپر کے ہاتھوں کیچ آؤٹ ہو گئے۔ انضمام بھی نو کے انفرادی سکور پر بالاجی کی گیند پر وِکٹ کیپر کے ہاتھوں ہی کیچ آؤٹ ہوئے۔

پاکستان کی طرف سے آؤٹ ہونے والے پہلے کھلاڑی عمران فرحت تھے۔ انہیں بالاجی کی گیند پر سہواگ نے سلپ میں کیچ کیا۔

پاکستان کی طرف سے دوسری آؤٹ ہونے والے اوپنر توفیق عمر تھے۔ وہ عرفان پٹھان کی گیند پر ایل بی ڈبلیو آؤٹ ہوئے۔

پاکستان نے تیسرے روز انچاس رنز دو کھلاڑی آؤٹ پر کھیل ختم کیا تھا۔

بھارت نے اپنی پہلی اننگز میں پاکستان کے 224 رن کے جواب میں 600 رن بنائے۔ اس طرح بھارت نے تین سو چھہتر رنز کی سبقت کے ساتھ میچ پر اپنی گرفت مضبوط کر لی تھی۔

بھارت کی اننگز کی خاص بات نائب کپتان راہول ڈراوڈ کی ڈبل سنچری ہے۔ وہ دو سو ستر کے سکور پر عمران فرحت کی گیند پر بولڈ ہوئے۔ یہ پاکستان کے خلاف ڈراوِڈ ان کی پہلی سنچری ہے۔

بھارت نے ٹاس جیت کر پاکستان کو پہلے کھیلنے کی دعوت دی اور اس کے تیز رفتار بولر شروع ہی سے کھیل پر چھائے رہے۔ کوئی بھی پاکستانی کھلاڑی بھارتی بولروں کے سامنے جم کر نہ کھیل سکا۔