’ٹینس فیڈریشن میرے ڈوپنگ ٹیسٹ کی رپورٹس شائع کرے‘

ٹینس کے کھلاڑی رافیل ندال نے انٹرنیشنل ٹینس فیڈریشن (آئی ٹی ایف) سے کہا ہے کہ ممنوعہ ادویات کے تعلق سے ہونے والے ان کے تمام ٹیسٹ کی رپورٹس شائع کرے۔

سپین سے تعلق رکھنے والے عالمی نمبر پانچ کھلاڑی رافیل نے فرانس کی سابق وزیر روزلین بیشلے کے خلاف قانونی چارہ جوئی کرنے کا فیصلہ کیا ہے۔

٭ <link type="page"><caption> ڈوپنگ کا الزام، ندال قانونی چارہ جوئی کریں گے</caption><url href="http://www.bbc.com/urdu/sport/2016/03/160314_nadal_to_sue_former_french_minister_mb.shtml" platform="highweb"/></link>

خیال رہے کہ روزلین نے ان پر ڈوپنگ کا الزام لگایا تھا۔

آئی ٹی ایف کے نام ایک خط میں انھوں نے لکھا کہ ’لوگوں کو بغیر شواہد کے نہیں بولنا چاہیے‘۔

29 سال کھلاڑی نے کہا: ’براہ کرم بائیلوجیکل پاسپورٹ اور ڈوپنگ کے خلاف میری تاریخ کے ہمراہ میرے متعلق تمام معلومات کو منظر عام پر لائیں۔‘

رافیل کا خط موصول ہونے کے بعد آئي ٹی ایف نے کہا کہ 14 بار گرینڈ سلیم فاتح کبھی بھی ممنوعہ ادویات کی جانچ میں مثبت نہیں پائے گئے ہیں اور وہ اپنی رپورٹ کو عوام کے سامنے پیش کرنے کے لیے آزاد ہیں اور رپورٹس تک ان کی رسائی ہے۔

ندال نے آئی ٹی ایف سے کہا کہ مستقبل میں جب بھی ان کے ٹیسٹ ہوں اور جیسے ہی نتائج سامنے آئیں اس کے بارے میں بتایا جائے۔

خیال رہے کہ رواں سال خواتین کی ٹینس سٹار ماریا شراپووا نے میلوڈونیم لینے کا اعتراف کیا تھا اور ان پر عارضی پابندی عائد ہے۔

برطانیہ کے نمبر ایک کھلاڑی اینڈی مرے نے رواں ماہ ایک اخبار سے کہا تھا کہ انھیں بعض کھلاڑیوں کے بارے میں شک ہے کیونکہ ’وہ تھکنے کا نام ہی نہیں لیتے۔

دوسرے کھیلوں میں دوپنگ سے متعلق نتائج کے افشا کا معاملہ متنازع رہا ہے۔