ہاکی چیمپیئنز ٹرافی: پاکستان کو پہلے میچ میں ہی شکست

بھارت میں جاری چیمپئنز ٹرافی ہاکی ٹورنامنٹ کے پہلے دن انگلینڈ نے آسٹریلیا اور بیلجیئم نے پاکستان کو شکست دے کر فاتحانہ آغاز کیا ہے۔

بھوونیشور میں سنیچر کی دوپہر کھیلے جانے والے میچ میں بیلجیئم نے پاکستان کو ایک کے مقابلے میں دو گول سے شکست دی۔

ریڈ لائنز کے نام سے معروف یورپی ٹیم نے گرین شرٹس کے خلاف پہلے کوارٹر کے 12ویں منٹ میں ٹینگوئی کزنز کے گول کی بدولت برتری حاصل کی۔

پہلے کوارٹر میں بیلجیئم کی ٹیم میں کھیل پر چھائی رہی اور پاکستانی ٹیم ایک بھی اچھا حملہ نہ کر سکی۔

دوسرے کوارٹر میں پاکستانی ٹیم نے نسبتاً بہتر کھیل کا مظاہرہ کیا تاہم وہ گول برابر کرنے میں کامیاب نہ ہو سکی۔

اسی کوارٹر میں بیلجیئم کی ٹیم نے میچ کا پہلا پنلٹی کارنر بھی حاصل کیا لیکن وہ بھی اس سے فائدہ نہ اٹھا سکی۔

میچ کے 36ویں منٹ میں پاکستان کو پہلے پنلٹی کارنر اور پھر پنلٹی سٹروک ملا جس پر محمد عمران نے گول کر کے مقابلہ برابر کر دیا۔

تاہم تیسرے کوارٹر میں کے آخری منٹ میں بیلجیئم نے ایک اور گول کر کے دوبارہ برتری حاصل کر لی جو آخر تک قائم رہی۔

پاکستان ماضی میں تین مرتبہ چیمپیئنز ٹرافی جیت چکا ہے لیکن آخری مرتبہ اسے طلائی تمغہ 20 برس قبل ملا تھا۔

انگلینڈ کی اپ سیٹ فتح

اس سے قبل انگلینڈ ٹورنامنٹ کے افتتاحی میچ میں دفاعی چیمپیئن آسٹریلیا کو ایک کے مقابلے میں تین گول سے شکست دے کر اپ سیٹ کر دیا۔

کالنگا سٹیڈیم میں کھیلے گئے میچ میں انگلینڈ کے الیسٹر براگڈن نے پہلے کوارٹر کے چھٹے منٹ میں گول کر کے اپنی ٹیم کو برتری دلوائی۔

اس برتری کو دوسرے کوارٹر میں اور میچ کے 27ویں منٹ میں سیموئل وارڈ نے دوگنا کر دیا۔

چوتھے کوارٹر میں آسٹریلیا کے کرس کریلو نے پینلٹی کارنر پرگول کر کے انگلینڈ کی برتری کم کر دی۔

کھیل کے آخری لمحات میں آسٹریلیا نے میچ برابر کرنے کی کئی کوششیں کیں جو کامیاب نہ ہو سکیں تاہم اسی دوران انگلش ٹیم سیموئل وارڈ کی کوشش کے نتیجے میں ایک اور گول کرنے میں کامیاب رہی۔

راؤنڈ رابن کی جگہ پھر پول سسٹم

چھ سے 14 دسمبر تک کھیلے جانے والے اس ٹورنامنٹ میں کل آٹھ ٹیمیں شریک ہیں۔

ان ٹیموں کو دو گروپوں میں تقسیم کیا گیا ہے اور پول اے میں دفاعی چیمپیئن آسٹریلیا، انگلینڈ، پاکستان اور بیلجیئم کی ٹیمیں ہیں جبکہ پول بی بھارت، ہالینڈ، جرمنی اور ارجنٹائن کی ٹیموں پر مشتمل ہے۔

بھارت کو میزبان ہونے کے ناطے ٹورنامنٹ میں جگہ ملی ہے جبکہ آسٹریلیا، ہالینڈ، پاکستان اور بیلجیئم 2012 میں ہونے والی چیمپیئنز ٹرافی میں ابتدائی پانچ ٹیموں میں شامل ہونے کی وجہ سے اس ٹورنامنٹ میں شرکت کے حقدار قرار پائے ہیں۔

اس کے علاوہ دیگر ارجنٹائن کی ٹیم 2102 کے چیمپیئز چیلینج مقابلے کی فاتح ہونے کے ناتے ٹورنامنٹ میں شریک ہے جبکہ انگلینڈ اور جرمنی کو انٹرنیشنل ہاکی فیڈریشن کے ایگزیکیٹو بورڈ نے نامزد کیا تھا۔

گذشتہ برس سے یہ ٹورنامنٹ راؤنڈ رابن لیگ کی بجائے پول سسٹم کے تحت کھیلا جا رہا ہے جس کی وجہ سے دونوں گروپوں کی تمام ٹیمیں ہر حال میں کوارٹر فائنل تک تو پہنچ ہی جاتی ہیں۔