لاہوری ہوں اس لیے لاہور قلندرز کی حمایت کروں گا: پاکستانی ٹینس پلیئر اعصام الحق

پاکستانی ٹینس کھلاڑی اعصام الحق دبئی اوپن میں مصروف ہونے کے باوجود پاکستان سپرلیگ سے بھی لطف اندوز ہورہے ہیں۔

اعصام الحق نے بی بی سی اردو سے بات کرتے ہوئے کہا کہ پاکستان سپر لیگ میں حصہ لینے والی تمام ٹیمیں پاکستانی ہیں لیکن چونکہ وہ خود لاہوری ہیں لہذا وہ لاہور قلندرز کی حمایت کررہے ہیں۔

گو کہ لاہور قلندرز کی ٹیم ابھی تک قابل ذکر کارکردگی دکھانے میں کامیاب نہیں ہوسکی ہے لیکن انہیں امید ہے کہ اگلے میچوں میں وہ اپنے پرستاروں کو مایوس نہیں کرے گی۔

پارٹنرز کی تبدیلی نے بہت کچھ سکھایا: اعصام الحق

ڈیوس کپ کی میزبانی مثبت پیغام ہے: اعصام الحق

اعصام الحق نے کہا کہ وہ نیوزی لینڈ کے برینڈن میک کلم کے مداح ہیں جنہوں نے اپنے ملک کے لیے نمایاں کارکردگی کامظاہرہ کیا ہے اور وہ ایک ورلڈ کلاس بیٹسمین اور قائدانہ صلاحیتوں کے مالک ہیں۔

اعصام الحق کا کہنا ہے کہ انہوں نے پاکستان سپر لیگ کی افتتاحی تقریب اسٹیڈیم جاکر دیکھی۔ انھیں عابدہ پروین اور دیگر فنکاروں کی پرفارمنس نے بہت متاثر کیا اس کے علاوہ انہوں نے لیگ کے کچھ میچز بھی دیکھے جس کے بعد وہ دبئی اوپن میں مصروف ہوگئے ۔

اعصام الحق کا کہنا ہے کہ خوش آئند بات یہ ہے کہ اس بار پاکستان سپر لیگ کے دو پلے آف لاہور میں جبکہ فائنل کراچی میں کھیلا جائے گا جس کے بعد امید کی جاسکتی ہے کہ آئندہ سال لیگ کے زیادہ تر میچز پاکستان میں ہونگے۔

اعصام الحق نے کہا کہ ملک میں حالات بہتر ہورہے ہیں اور ڈیوس کپ کے علاوہ کرکٹ کی انٹرنیشنل سرگرمیاں بھی ملک میں شروع ہوچکی ہیں جیسا کہ گزشتہ سال ورلڈ الیون اور سری لنکا کی ٹیمیں لاہور میں ٹی ٹوئنٹی انٹرنیشنل میچز کھیل چکی ہیں یہ اسی کا نتیجہ ہے کہ کھلاڑیوں کا اعتماد بھی بحال ہو رہا ہے کہ پاکستان ایک محفوظ ملک ہے۔