انڈین کھلاڑیوں کے سیاہ پٹیاں باندھنے پر پاکستان کا احتجاج

پاکستان ہاکی فیڈریشن نے ورلڈ کپ ہاکی کوالیفائنگ راؤنڈ کے منتظمین سے انڈین کھلاڑیوں کی جانب سے بازوؤں پر سیاہ پٹیاں باندھ کر میچ کھیلنے پر سخت احتجاج کیا ہے۔

یاد رہے کہ لندن میں جاری ورلڈ کپ ہاکی کوالیفائنگ راؤنڈ میں پاکستان اور انڈیا کے درمیان کھیلے گئے میچ میں انڈین کھلاڑیوں نے بازوؤں پر سیاہ پٹیاں باندھ رکھی تھیں جس کے بارے میں کہا گیا ہے کہ انھوں نے گذشتہ دنوں کشمیر میں ہلاک ہونے والے انڈین سپاہیوں کے ساتھ اظہار یکجہتی کے طور پر ایسا کیا تھا۔

پاکستان ہاکی فیڈریشن کے سیکریٹری سابق اولمپیئن شہباز احمد نے لندن سے بی بی سی کے نامہ نگار عبدالرشید سکور کو بتایا کہ انھوں نے اس سلسلے میں برطانوی ہاکی فیڈریشن کی چیف ایگزیکٹیو آفیسر سیلی منڈے اور کوالیفائنگ مقابلوں کے آرگنائزنگ کمیٹی کے سربراہ سے بات کی ہے جس پر ان دونوں نے معذرت کرتے ہوئے کہا ہے کہ کھیلوں کے مقابلوں میں کسی بھی طرح کا سیاسی پیغام اجاگر نہیں کیا جاسکتا۔

شہباز احمد کا کہنا ہے کہ انٹرنیشنل ہاکی فیڈریشن جس طرح اپنی گرفت رکن ممالک پر مضبوط کرتی جارہی ہے اور اپنی من مانی کررہی ہے، اسے اس واقعے کا سخت نوٹس لینا چاہیے کہ انڈیا نے یہ حرکت کیوں کی۔

شہباز احمد نے کہا کہ انڈین ہاکی ٹیم نے اپنی اس حرکت سے اپنا امیج خود خراب کیا ہے اور انہوں نے دراصل یہ ایک منفی پیغام دینے کی کوشش کی ہے۔

واضح رہے کہ گذشتہ سال ایشیئن چیمپئنز ٹرافی کے فائنل میں انڈیا کی پاکستان کے خلاف جیت کے بعد بھارتی گول کیپر پی آر شری جیش نے اس جیت کو بھارتی فوجیوں کے نام کر دیا تھا۔

غور طلب بات یہ ہے کہ آئی سی سی چیمپیئنز ٹرافی کے فائنل کے بعد انڈین صحافیوں نے بھارتی کرکٹر یوراج سنگھ سے بھی یہ سوال کیا تھا کہ انڈین کرکٹ ٹیم نے ہاکی ٹیم کی طرح بازوؤں پر پٹیاں باندھ کر میچ کیوں نہیں کھیلا لیکن یوراج سنگھ نے اس کا کوئی جواب نہیں دیا تھا۔