’پاکستان سپر لیگ کا فائنل لاہور میں ہی ہو گا‘
،تصویر کا ذریعہAFP
پاکستان سپر لیگ کے دوسرے ایڈیشن کا فائنل پانچ مارچ کو لاہور کے قذافی سٹیڈیم میں ہی منعقد کروانے کا فیصلہ کر لیا گیا ہے۔
شارجہ سے نامہ نگار عبدالرشید شکور کے مطابق یہ فیصلہ پاکستان سپر لیگ کی پانچوں فرنچائزز ٹیموں کے اجلاس میں کیا گیا جو پیر کو دبئی میں پاکستان سپر لیگ کے چیئرمین نجم سیٹھی کی صدارت میں ہوا
پاکستان کرکٹ بورڈ پہلے یہ اعلان کرچکا ہے کہ وہ ہر قیمت پر فائنل لاہور میں کرائے گا تاہم پاکستان کے مختلف شہروں میں حالیہ خود کش دھماکوں کے بعد لاہور میں فائنل کے انعقاد کے بارے میں شکوک وشبہات ظاہر کیے جا رہے تھے۔
اس صورتحال میں پاکستانی فوج کے سربراہ جنرل قمر جاوید باجوہ نے بھی فائنل کے انعقاد میں فوج کی جانب سے ہرممکن تعاون کی یقین دہانی کرائی تھی۔
پیر کو ہونے والے اجلاس میں تمام پانچوں فرنچائزز مالکان نے فائنل کے پاکستان میں انعقاد کی حمایت کی اور یہ کہا ہے کہ اس وقت قومی یک جہتی کا مظاہرہ کرنے کی ضرورت ہے اور اس ضمن میں یہ فائنل لاہور میں ہی کرایا جائے۔
End of سب سے زیادہ پڑھی جانے والی
،تصویر کا ذریعہReuters
اجلاس میں پاکستان کرکٹ بورڈ نے تمام فرنچائزز سے کہا ہے کہ وہ غیر ملکی کرکٹرز کو لاہور میں فائنل کھیلنے کے لیے قائل کرنے کے سلسلے میں اپنا کردار ادا کریں۔
دوسری جانب کرکٹرز کی ایسوسی ایشنز کی فیڈریشن فیکا نے ایک بار پھر لاہور میں فائنل کے انعقاد کو سکیورٹی کا خطرہ قرار دے دیا ہے۔
فیکا کے چیف ایگزیکٹیو ٹونی آئرش نے پیر کو ایک بیان میں کہا ہے کہ لاہور میں سکیورٹی کا خطرہ موجود ہے اور فیکا نے اس ضمن میں تمام کرکٹرز کو 'ہائی سکیورٹی رسک' سے آگاہ کر دیا ہے اب یہ ان کرکٹرز پر منحصر ہے کہ وہ لاہور جانے کے بارے میں کیا فیصلہ کرتے ہیں۔
فیکا نے پاکستان سپر لیگ کے آغاز پر بھی ایک تفصیلی رپورٹ جاری کی تھی جس میں کہا گیا تھا کہ غیر ملکی کرکٹرز لاہور کا سفر اختیار کرنے سے گریز کریں لیکن پاکستان کرکٹ بورڈ نے اس رپورٹ کو یہ کہہ کر مسترد کردیا تھا کہ یہ حقائق پر مبنی نہیں ہے۔
