 | | | یوٹیوب کی بندش پاکستان میں غیر معینہ مدت کے لیے ہے |
انٹر نیٹ کی ایک مقبول ترین ویڈیو سائٹ ’یو ٹیوب‘ اتوار کے دن ایک گھنٹے سے زیادہ دیر تک پوری دنیا میں بند رہی اور اس کی وجہ پاکستان کی طرف سے سائٹ کو پاکستان کے اندر بند رکھنے کی کوشش قرار دیا جا رہا ہے۔ بی بی سی نیوز کو معلوم ہوا ہے کہ یو ٹیوب کے پوری دنیا میں بند ہونے کا تعلق یقینی طور پر پاکستان ٹیلی کام اور ایشین انٹر نیٹ سروس پروائڈر یا انٹر نیٹ کی سہولت فراہم کرنے والے ایشائی ادارے ’پی سی سی ڈبلیو‘ سے تھا۔ پاکستان نے انیٹر نیٹ سروس فراہم کرنے والے ادارے سے کہا تھا کہ وہ اس سائٹ کو بلاک کر دے یا روک دے کیونکہ اس پر کچھ ایسا مواد موجود ہے جو اسلام کے منافی ہے۔ بی بی سی نیوز کی ویب سائٹ ایڈیٹر ڈیرن واٹرز کا کہنا ہے کہ پاکستان کے لوگوں کے لیے یوٹیوب تک رسائی کو ناممکن بنانے کے لیے ہو سکتا ہے پاکستان ٹیلی کام نے ویب سروس کا ایڈرس ہائی جیک کر لیا ہو۔ جس کے بعد یہ تمام تفصیلات پاکستان کے اندر انٹر نیٹ سروس کی سہولت فراہم کرنے والے اداروں کو فراہم کر دی گئی ہوں تاکہ جو بھی اس سائٹ کو کھولنے کی کوشش کرے وہ اسے دوسری ویب سائٹ کی طرف لے جائیں۔ اس کے بعد ہائی جیک کی تفصیلات پی سی سی ڈبلیو سے وسیع تر نیٹ پر بھی پھیل گئیں اور انٹر نیٹ سروس فراہم کرنے والے اداروں کی غلطی سے یوٹیوب پوری دنیا میں بند ہو گئی۔ تاہم یوٹیوب کی اس بندش کو اس وقت کھولا گیا جب پی سی سی ڈبلیو کو یو ٹیوب کے انجینیئروں نے اس صورت حال سے آگاہ کیا۔ انٹر نیٹ کے ایک ماہر نے بی بی سی کو بتایا کہ شاید یہ پاکستان میں ٹیلی کام کے ایک انجینیئر کی معمولی سے غلطی تھی اور اس میں کوئی بد نیتی شامل نہیں تھی۔
آئی پی ہائی جیکنگ کا مطلب ہوتا ہے کہ سائٹ کا مخصوص ایڈرس یا پتہ حاصل کرکے اس میں روٹنگ یا راستے کے درج ٹیبلز میں ردوبدل کر دی جائے اور اسی سے پوری دنیا میں معلومات یا ڈیٹا کا بھاؤ ممکن ہوتا ہے۔ یوٹیوب اور پی سی سی ڈیبلو کی طرف سے فوری طور پر اس پر تبصرہ کرنے کے لیے کوئی نہیں مل سکا۔ اطلاعات کے مطابق پاکستان نے یہ حرکت اس لیے کی تھی کہ یوٹیوب کے مواد میں پیغمبر اسلام کے بارے میں توہین آمیز کارٹون بھی شامل تھے۔ ایک اور اطلاع کے مطابق پاکستان نے اس لیِے یو ٹیوب پر بندش لگانے کی کوشش کی کیونکہ اس پر ہالینڈ کے فلم ساز کی آنے والی فلم کا ٹریلر بھی دستیاب تھا جس میں اسلام کو منفی انداز میں پیش کیا گیا ہے۔ پاکستان میں انٹر نیٹ سروس فراہم کرنے والوں کی تنظیم کے رابط افسر وہاج السراج نے کہا کہ حکام کی طرف سے کہا گیا ہے کہ اسے فوری طور پر بند کر دیا جائے اور یہ بندش تا حکم ثانی برقرار رہے گی۔ وہاج السراج کے مطابق اس پر پاکستان میں شدید رد عمل ظاہر کیا جا رہا ہے۔ | 
سٹیم سیل ریسرچ پر پابندی’ختم‘
