ایپل کے سربراہ سٹیو جوبز آئی فون کو متعارف کروا رہے ہیں

دونوں اداروں نے اس بات سے اتفاق کیا ہے کہ وہ اپنی مصنوعات کے لیے آئی فون کا نام استعمال کریں گے۔

پچھلے ماہ ایپل نے اعلان کیا تھا کہ وہ اپنے نئے آئی پوڈ والے فون کا نام آئی فون رکھ رہا ہے۔ دوسری طرف سسکو نے یہ نام 2000 میں رجسٹر کروا رکھا تھا۔

سسکو نے یہ الزام لگایا تھا کہ ایپل نے جان بوجھ کر اس کے ٹریڈمارک کی خلاف ورزی کی ہے۔

نئے سمجھوتے کے مطابق دونوں ادارے آئی فون کا نام دنیا بھر میں اپنی تمام مصنوعات کے لیے استعمال کر سکتے ہیں۔ اس معاہدے کے تحت ایپل اور سسکو کے درمیان نام سے متعلقہ تمام قانونی تنازعات بھی ختم ہو گئے ہیں۔

ایک مشترکہ بیان کے مطابق دونوں ادارے سکیورٹی، عام استعمال کی مصنوعات اور کاروبار کے شعبے میں مل کر کام کریں گے۔

ایپل نے سان فرانسسکو میں جنوری میں میک ورلڈ نامی ایک نمائش میں اپنا آئی فون متعارف کروایا تھا۔