ماہرین کا کہنا ہے کہ زُون آئی پوڈ کا مقابلہ کرے گا

مائیکرو سوفٹ کا کہنا ہے کہ وہ تفریح اور میوزک کے کئی ہارڈ وئیرز پر کام کر رہا ہے جس میں سے پہلی پراڈکٹ اس سال کے آخر میں متعارف کرائے گا۔

ایپل کے کامیاب ترین پورٹیبل میوزک پلیئر آئی پوڈ کا مقابلہ کرنے سے متعلق بہت سی افواہیں دم توڑ چکی ہیں اسی لئے ماہرین کا کہنا ہے کہ مائیکروسوفٹ کو ایپل سے سخت مقابلے کا سامنا ہے۔

ڈیجیٹل میوزک پلئیرز میں آئی پوڈ پچاس فیصد سے زیادہ بک چکا ہے جبکہ ایپل کے ڈیجیٹل میوزک سٹور ’آئی ٹیونز‘ کا مارکیٹ میں ستّر فیصد حصہ ہے۔

ماہرین کا کہنا ہے کہ مائیکروسوفٹ بہت عرصے سے چھوٹے سائز کے تفریحی آلات مارکیٹ میں لانے کی کوشش کر رہا ہے کیونکہ بڑی جسامت کے آلات اب پرانے ہو چکے ہیں۔

مائیکروسوفٹ کا کہنا ہے کہ وہ اس سلسلے میں نئے برانڈ زُون پر کام کر رہا ہے مگر اس کے علاوہ اور کوئی معلومات نہیں دیں۔

مائیکروسوفٹ کے مارکیٹنگ کے جنرل مینیجر کرس سٹیفنسن کا کہنا ہے کہ زُون کے نام سے بہت سے آلات مارکیٹ میں لائیں جائیں گے۔ جنرل مینیجر نے مزید کہا کہ ’ہم ٹیکنالوجی اور کمیونٹی کواکٹھا لا کر گاہکوں کو یہ سہولت دیں گے کہ وہ موسیقی میں نئی دریافتیں کریں۔‘

ماہرین کا کہنا ہے کہ زُون کی کامیابی کا انحصار اس بات پر ہے کہ آیا اس پر موسیقی اور ویڈیو تاروں کے بغیر ڈاؤن لوڈ کیا جا سکتا ہے یا نہیں۔

جوپیٹر ریسرچ کے مائیکل گارٹنبرگ کے مطابق ’مائیکروسوفٹ کو اس سلسلے میں نہایت سخت مقابلہ درپیش ہے جو کسی جنگ سے کم نہیں۔ آئی پوڈ کے مقابلے پہ کچھ لانا بہت ہی دشوار ہے۔‘