نظام شمسی سے باہر سیّارے کا تصوراتی خاکہ

کئی ماہرین تیرہ ارب سال پہلے کائنات میں چمکنے والے پہلے ستاروں کی روشنی کی تلاش میں ہیں لیکن انہیں اب تک کامیابی نہیں مِلی۔

دنیا بھر میں سائنسدان ایسی چیزوں کا پتہ لگانے کی کوشش میں ہیں جنہیں دیکھنے کی سہولت ان کے پاس نہیں ہے۔

انیس سو اسّی اور نوّے کی دہائی میں کچھ سائنسدانوں نے فیصلہ کیا کہ دوسرے ستاروں کے مدار میں چکر لگانے والے سیّاروں کو نہ دیکھ سکنا اس بات کی معقول وجہ نہیں ہے کہ انہیں تلاش کرنے کی کوشش بھی نہ کی جائے۔

ان ماہرین کی کامیابی کا دارومدار ان ستاروں کی اس معمولی سی حرکت کا پتہ لگانے پر تھا، جو ان کے گرد گھومتے ہوئے اور نظروں سے اوجھل سیاروں کی کشش ثقل کی وجہ سے ہوتی تھی۔

جامعۂ کیلیفورنیا برکلے کے پروفیسر جیف مارسی نے بتایا کہ یہ مشکل کام تھا کیونکہ ایک بڑا سیاہ اپنے ستارے کو اتنی رفتار سے کھینچتا ہے جتنی تیزی سے ایک انسان دوڑتا ہے۔

انہوں نے کہا کہ نوری سالوں کے فاصلے سے ستاروں کی ان معمولی حرکات کا پتہ لگانے کے لیئے دس سال کا عرصہ درکار تھا۔ انہوں نے کہا کہ اس طرح پہلے پہل جن سیاروں کا پتہ لگایا گیا وہ بہت بڑے تھے اور بعض ہمارے نظام شمسی کے سب سے بڑے سیّارے سے کئی گنا بڑے تھے۔

آجکل فلکیات کے اس میدان کی کامیابیوں کی بنیاد چھوٹے سیاروں کا پتہ لگانے میں ہے۔

جن دنیاؤں کی اب تلاش کی جا رہی ہے وہ اتنی چھوٹی ہیں کہ اپنے ستاروں کو صرف ایک کیڑے کے چلنے کی رفتار سے ہلا سکتی ہیں یعنی کہ چند سیکنڈ میں کچھ سنٹی میٹر ہے۔

اتنی معمولی سی حرکت کسی انتہائی اہم چیز مثلاً زمین جیسے سیارے کا پتہ دے سکتی ہے۔ یہی وہ چیز ہے جو ماہرین کی ہمت بنائے ہوئے ہے جو اب بھی ہمارے نظامِ شمسی سے باہر کسی سیارے کی جھلک دیکھنے سے کئی دہائیاں دور ہیں۔