ڈرائیونگ میں مدد دینے کے علاوہ یہ کئی طرح کے دماغی مریضوں کے لیئے فائدہ مند ہوگا

لندن میں ہونے والی ایک بڑی نمائش میں ایسا کمپیوٹر پیش کیا جائے گا جو انسان کی ذہنی حالت جاننے کی صلاحیت رکھتا ہوگا۔

برطانیہ کی رائل سوسائٹی سمر سائنس نامی ادارہ لوگوں کو دعوت دے رہا ہے کہ وہ کمپیوٹر کو غم، خوشی اور دیگر جذبات سے باشعور کرنے میں ان کی مدد کریں۔

اس خصوصی کمپیوٹر پروگرام کو ڈیزائن کرنے والے ماہرین کا کہنا ہے کہ کمپیوٹر میں یہ نئی صلاحیت پیدا کرنے سے صارفین میں اضافہ ہوگا اور اس کے کئی استعمال ہوں گے۔ مثلاً ڈرائیونگ کے دوران مدد دینے کے علاوہ یہ کئی طرح کے دماغی مریضوں کے لیئے فائدہ مند ہوگا۔

اس خصوصی پروگرام کے لیئے کمپیوٹر کے ساتھ کیمرہ بھی نصب ہے جو استعمال کرنے والے شخص کے چہرے کے زاویوں اور لکیروں سے یہ اخذ کرسکے گا کہ کمپیوٹر پر بیٹھا شخص کس موڈ میں ہے۔

یہ حساس کیمرہ چہرے کی بیس معمولی حرکات کو ریکارڈ کرسکے گا مثلاً سر کی جنبش، ابروؤں کا اوپر یا نیچے ہونا یا منہ اور ہونٹوں کی حرکات و سکنات وغیرہ۔

چہرے کے زاویوں کے امتزاج سے کمپوٹر سافٹ ویئر اخذ کرے گا کہ اس سے غصہ، خوشی یا غم ظاہر ہورہا ہے۔

کیمرج یونیورسٹی کے پروفیسر پیٹر رابنسن کا کہنا ہے کہ وہ گاڑیوں کی ایک کمپنی کے ساتھ مل کر کام کررہے ہیں جس کا خیال ہے کہ اگلے پانچ سال تک یہ جدید سافٹ ویئر گاڑیوں میں نصب کردیا جائے گا جس سے محفوظ ڈرائیونگ میں مدد ملے گی۔