موبائل فون بنانے والی بڑی کمپنیاں بشمول نوکیا پراعتماد ہیں کہ یہ جدت کامیاب رہے گی

گویا لوگوں کو اپنا من پسند پروگرام دیکھنے کے لیے گھر جانے کی ضرورت نہیں، وہ اپنے فون پر ہی ٹی وی پروگرام سے لطف اندوز ہوسکتے ہیں۔

اگرچہ دنیا میں موبائل پر ٹی وی دیکھنے کی سہولت پہلے بھی فراہم کی جاچکی ہے لیکن اندازہ ہے کہ جاپان میں موبائل ٹی وی کی مارکیٹ دنیا میں سب سے بڑی ثابت ہوگی۔

فی الحال جاپان میں یہ نئے طرز کے موبائل فون محدود پیمانے پر مارکیٹ میں آئے ہیں اس لیئے لوگوں کو یہ خریدنے میں کچھ مشکل کا سامنا ہے۔

ملک کے 90 ملین فون استعمال کرنے والے اپنے فون پر پہلے ہی وڈیو گیمز اور انٹرنیٹ تک رسائی رکھتے ہیں۔

اس نئی سروس کے لیئے کئی ماہ پہلے سے تجرباتی نشریات چلائی جارہی تھیں اور ابھی کچھ عرصہ تک یہ سہولت مفت فراہم کی جائے گی تاکہ اس دوران یہ اندازہ لگایا جاسکے کہ مارکیٹ میں اس کی کتنی مانگ ہے۔

جاپان کے سب سے بڑے موبائل آپریٹر این ٹی ٹی ڈوکومو کے سربراہ کا کہنا ہے کہ ابھی موبائل ٹی وی پر وہی نشریات آئیں گی جوکہ عام ٹی وی پر دیکھی جاسکتی ہیں۔ ’تاہم اب ہم اس تیاری میں ہیں کہ موبائل ٹی وی فون استعمال کرنے والوں کے لیئے خصوصی نشریات کا انتظام کیا جائے۔‘

جدید طرز کے موبائل فون مارکیٹ میں آنے سے قبل کئی حلقوں نے اس نئے خیال کے بارے میں خدشہ ظاہر کیا تھا کہ کیا واقعی لوگ موبائل فون پر ٹی وی دیکھنا چاہیں گے یا نہیں تاہم موبائل فون بنانے والی بڑی کمپنیاں بشمول نوکیا پراعتماد ہیں کہ یہ جدت کامیاب رہے گی اور جاپان میں کافی حد تک ایسا ہوتا نظر آرہا ہے۔

ان اداروں کا خیال ہے کہ یہ فونز نہ صرف صارفین میں انتہائی مقبول ہوں گے بلکہ یہ اداروں کی آمدنی میں اضافے کا ذریعہ بھی بنیں گے۔