ایک تازہ ترین تحقیق کے مطابق موبائل فون کے استعمال سے دماغ میں رسولی پیدا ہونے کا خطرہ پیدا نہیں ہوتا۔ تاہم رپورٹ تیار کرنے والوں کے مطابق یہ ٹیکنالوجی ابھی نئی ہے اور اس کے اثرات کو سمجھنے کے لیے ابھی مزید اعداد و شمار کی ضرورت ہے۔ ڈنمارک میں ہونے والی اس تحقیق میں ایک ہزار لوگوں نے حصہ لیا۔ ماہرین کے مطابق لوگوں کو ہینڈ فری کٹ والے موبائل استعمال کرنے چاہییں تاکہ دماغ برقیاتی لہروں سے محفوظ رہے۔ برطانوی ماہرین کا کہنا ہے کہ بچوں کو احتیاطاً موبائل فون کم استعمال کرنا چاہیں۔ برطانوی حکومت نے انیس سو نوّے کی دہائی میں ایک گروپ کو موبائل فون کے صحت پر ممکنہ اثرات کا جائزہ لینے کے لیے کمشن کیا۔ کشن کی سربراہی سر ولیم سٹیورٹ نے کی۔ کمشن کی طرف سے تازہ ترین شواہد سے بھی معلوم ہوتا ہے کہ موبائل فون کے صحت پر منفی اثرات نہیں ہیں۔ لیکن اس کے باوجود موبائل کے بارے میں بحث ختم نہیں ہوئی کیونکہ ابھی یہ طے نہیں ہو سکا کہ ان سے نکلنے والی ایلکٹرومیگنیٹک لہریں انسانوں کے لیے نقصان دہ ہیں کہ نہیں۔ دعویٰ کیا جاتا رہا ہے کہ یہ لہریں خلیوں، دماغ یا جسم مدافعاتی نظام کو متاثر کرتی ہیں اور کینسر سمیت بیماریوں کا باعث بن سکتی ہیں۔ | 
یہ صفحہ دوست کو ای میل کیجیئے
پرِنٹ کریں
