خنزیر تاریکی میں چمکتے ہیں

اگرچہ ماضی میں سائنسدانوں نے تاریکی میں چمکنے والے ’دودھیا‘ سور پیدا کیے ہیں لیکن تائیوان کے سائنسدانوں کا کہنا ہے کہ ان کے سور سبز رنگ کے بھی ہیں۔

سائنسدانوں نے جیلی مچھلی کی جین کو سور کے جنین میں ملاکر چمکنے والے یہ سور پیدا کیے۔

تائیوان کے ان سائنسدانوں کو امید ہے کہ ان کی اس نئی تحقیق سے ملک میں سٹیم سیل ریسرچ کو فروغ ملے گا اور اس سے انسانی بیماریوں کے مطالعے میں مدد ملے گی۔

نیشنل تائیوان یونیورسٹی کے سائنسدانوں نے بتایا کہ اگرچہ یہ سور چمکتے ہیں تاہم باقی دیگر سور کی طرح ہی ہیں۔

اس جنیاتی تجربے میں تین سور پیدا کیے گئے اور ان کے دل اور اندرونی اعضاء بھی سبز ہیں۔

اس عمل میں سائنسدانوں نے جیلی مچھلی کے ڈی این اے کو سور کے دو سو پینسٹھ جنین میں ملاکر آٹھ سوروں کے رحم میں داخل کیا۔

آخرکار آٹھ میں سے صرف چار سور حاملہ ہوگئے اور انہوں نے تین بچوں کو لگ بھگ تین ماہ قبل جنم دیا۔

دن کی روشنی میں ان کی آنکھیں، دانت اور دیگر اعضاء سبز دکھائی دیتے ہیں۔ ان کے چمڑے ’سبز جیسے‘ دکھائی دیتے ہیں لیکن شب کی تاریکی میں ٹارچ کی روشنی کی طرح چمکتے ہیں۔