جین ویک فیلڈ ٹیکنالوجی رپورٹر، بی بی سی نیوز

کچھ حلقوں نے اس نئے خیال کے بارے میں خدشہ ظاہر کیا ہے کہ کیا واقعی لوگ موبائل فون پر ٹی وی دیکھنا چاہیں گے یا نہیں تاہم موبائل فون بنانے والی بڑی کمپنیاں بشمول نوکیا پراعتماد ہیں کہ یہ جدت کامیاب رہے گی۔

ان اداروں کا خیال ہے کہ یہ فونز نہ صرف صارفین میں انتہائی مقبول ہوں گے بلکہ یہ اداروں کی آمدنی میں اضافے کا ذریعہ بھی بنیں گے۔

یوں معلوم ہوتا ہے کہ اگلا سال ٹی وی فون کا سال ہوگا۔ کہا جارہا ہے کہ اس فون کی مقبولیت اسی طرح ہے جس طرح تھری جی سروس کی مقبولیت تھی۔

نوکیا کے نائب صدر مارک سیلبی کا کہنا ہے کہ موبائل ویب براؤزنگ کے برعکس موبائل ٹی وی کا خیال پیچیدہ نہیں ہے اور یہ لوگوں کو استعمال میں آسان اور پرکشش لگے گا۔

تھری جی فون نے پہلے ہی محدود پیمانے پر ٹی وی کی سہولت آزمائشی طور پر شروع کردی ہے تاہم اس کا دورانیہ صرف تین منٹ ہے۔ ماہرین کا کہنا ہے کہ اس دورانیے کو بڑھانے کی ضرورت ہے۔

تھری جی کی تحقیق کے مطابق لوگوں نے ٹی وی کا استعمال اپنے کھانے اور دیگر وقفوں کےدوران کیا۔

ماہرین کی رائے ہے کہ برطانیہ میں اس سہولت کے لیے ماہانہ سات پاؤنڈ کی فیس مناسب رہے گی۔