تبدیلیوں کے بعد معتبر اداروں کی خبریں تلاش کے نتائج میں پہلے نمودار ہونگیں۔

گوگل نے امریکہ میں ایک ایسے پیٹنٹ کی درخواست دائر کی ہے جس کے بعد گوگل سرچ انجن پرخبروں کی تلاش ان کے معیار پر منحصر ہوگی نہ کہ ان کی افادیت پر۔

مثال کے طور پر اسِ وقت گوگل پر اگر کسی موضوع پر کوئی خبر تلاش کی جائے تو اُس موضوع سے متعلق انٹرنیٹ پر موجود ہزاروں نتائج معیار کی تفریق کے بغیر ہی سامنے آجاتے ہیں۔ یعنی یہ ضروری نہیں کہ بی بی سی یا سی این این جیسے متعبر اداروں کی خبریں تلاش کے نتیجے میں پہلے صفحات پر آئیں بلکہ ان کی بجائے کئی دوسرے چھوٹے اداروں کی خبریں جو تلاش کے لئے ٹائپ کئے گئے الفاظ سے زیادہ افادیت رکھتی ہیں پہلے صفحات پر آجائیں۔

لیکن نئے نظام کے بعد خبروں کے ذرائع اور اداروں کی ساکھ کو مد نظر رکھتے ہوئے کسی بھی تلاش کے نتیجے میں وہ خبریں پہلے سامنے آئیں گی جو روایتی طور پر معتبر اداروں کی ہونگی۔

لیکن کچھ مبصرین کا خیال ہے کہ خبروں کے معیار کو طے کرنا ایک غیر معروضی عمل ہے اور سرچ انجن کے موجودہ نظام سے جو محض افادیت اور تاریخ پر مبنی ہے، بہت مختلف ہے۔