 |  موبائل فون کمپنیوں کا کہنا ہے کہ اس کے استعمال سے انسانی صحت پر کوئی اثر نہیں پڑتا |
موبائل فون سے نکلنے والی ریڈیائی لہروں کی وجہ سے انسانی جسم کے خلیوں اور ڈی این اے کو نقصان پہنچ سکتا ہے۔ اس نئی سائنسی تحقیق سے یہ ثابت نہیں ہوسکا کہ ان لہروں سے انسانی صحت کو خطرہ لاحق ہے۔ یہ ریفلیکس تحقیق یورپی یونین کی مد د سے کرائی گئی ہے۔ سائنسدانوں کا کہنا ہے کہ موبائل فون کے انسانی صحت پر اثرات کا تعین کرنے کے لیے مزید تحقیق کی ضرورت ہے۔ برطانیہ کے نیشنل ریڈیولوجیکل پروٹیکشن بورڈ کا کہنا ہے کہ لوگوں کو اس تحقیق سے پریشان نہیں ہونا چاہیے۔ ادارے کے ایک ترجمان نے کہا کہ اس سے یہ پتہ نہیں چلتا کہ حیاتیاتی تبدیلیوں سے کوئی مرض لاحق ہوتا ہے۔ انہوں نے کہا کہ تحقیق سے یہ بھی ثابت نہیں ریڈیائی لہروں سے خلیوں پر ہونے والے اثر سے نقصان مستقل ہوتا ہے۔ دنیا میں اس وقت ڈیڑھ ارب لوگ موبائل فون استعمال کر رہے ہیں۔ موبائل فون کے استعمال سے ہونے والے اثرات کے حوالے سے ایک اور بحث بھی جاری ہے جو نہ صرف موبائل فون کمپنیوں کی طرف سے لگائے گئے انٹینوں اور ان سے نکلنے والی لہروں کے خطرات بلکہ ہینڈسیٹوں کے استعمال سے متعلق ہے۔ سن دو ہزار میں ایک برطانوی رپورٹ میں کہا گیا تھا کہ موبائل فون کے استعمال کے مضر اثرات کے بارے میں کوئی ثبوت نہیں ہے۔ موبائل فون بنانے والی کمپنیوں کا اصرار ہے کہ مقناطیسی لہروں کے مضر اثرات کےبارے میں ابھی تک کوئی سائنسی ثبوت موجود نہیں ہے۔ اس تحقیق کے دوران جرمنی کے تحقیقی ادارے ویرم نے انسانی اور جانوروں کے خلیوں پر ریڈیائی لہروں کے اثرات کا جائزہ لیا۔ تجبوں سے دریافت ہوا کہ مقناطیسی لہروں سے لای این اے کو نقصان پہنچتا ہے جسے خلیے درست نہیں کر سکتے۔ ریفلیکس تحقیق کے سربراہ فرانز ایڈل کوفر کا کہنا ہے کہ احتیاط کے طور پر لوگوں کو چاہیے کہ وہ جہاں ممکن ہو موبائل فون کی جگہ عام ٹیلی فون استعمال کریں۔ انہوں نے کہا کہ موبائل فون کے صحیح طور پر اثرات جاننے کے لیے ابھی چند سال اور درکار ہونگے۔ برطانیہ کے نیشنل ریڈیولوجیکل پروٹیکشن بورڈ کے اعلیٰ اہلکار کا کہنا ہے کہ یہ ایک دلچسپ تحقیق ہے لیکن اس سے لوگوں کو پریشان نہیں ہونا چاہیے۔ | 
یہ صفحہ دوست کو ای میل کیجیئے
پرِنٹ کریں
