آئین ہارڈی بی بی سی، شمالی امریکہ

ایبیلین نیٹ ورک پورے امریکہ میں پھیلا ہوا ہے

وہ دن دور نہیں جب آپ کے ڈیسک ٹاپ پر آڈیو اور ویڈیو آج کی عام براڈ بینڈ سروسز کی نسبت ہزار گنا تیزی سے آ جائیں گے۔

یہ امریکی کمپنی ایبیلین نیٹ ورک کا خواب ہے۔

ایبیلین نیٹ کو ایک انٹرنیٹ 2 نامی ادارہ چلاتا ہے اور ایک سیکنڈ میں 10 گیگا بٹس کا ڈیٹا ملک میں ایک جگہ سے دوسری جگہ بھیجنے کا حامل ہے۔

اس کا مطلب یہ ہے کہ مینہیٹن سکول آف میوزک میں ترتیب دی گئی جیز موسیقی ہزاروں میل دور ٹیکساس میں سنی اور دیکھی جا سکتی ہے۔

اس میں فل سکرین ویڈیو اور سٹیریو میوزک شامل ہے جو کہ 15.4 میگابٹ فی سیکنڈ کے حساب سے بھیجی جا سکتی ہے۔

مینہیٹن سکول کے ڈائریکٹر آف ڈسٹنس لرننگ کرسچیئن اورٹو کے مطابق ’یہ عام ڈائل اپ موڈیم سے 275 گنا تیز ہے‘۔

انٹرنیٹ 2 کی رکنیت کوئی سستا کام نہیں۔ کمپنی نائب صدر گیری باچولا کا کہنا ہے کہ ’ایک عام کمپنی جو انٹرنیٹ 2 کو استعمال کرنا چاہتی ہے اسے صرف کیمپس کے نیٹ ورک کو اپ گریڈ کرنے کے لیے آدھ ملین ڈالر تک خرچنے پڑتے ہیں‘۔