سندربن کے جنگلوں کا شہد بہت مشہور ہے

سندر بن کے جنگلات اہم عالمی ورثہ کی فہرست میں شامل ہیں۔ سندربن میں دنیا کے سب سے بڑے مینگروو کے جنگلات ہیں اور یہ بنگال کے شیر سمیت جانوروں کی بہت سی معدوم ہوتی ہوئی اقسام کا گھر بھی ہے۔

ماحول کے تحفظ کے لیے کام کرنے والے کارکنوں کا موقف ہے کہ سیاحوں کی آمد سے جنگل کا ماحول تباہ ہو جائے گا۔

لیکن منصوبہ پیش کرنے والی کمپنی سہارا کا کہنا ہے کہ اس سے سندربن کو فائدہ پہنچے گا۔

کمپنی کا کہنا ہے کہ سندربن کی سیر کے لیے آنے والے سیاحوں کے سفر کا آغاز کلکتہ سے ہوگا۔ اس کے اندازے کے مطابق وہ ہر روز پندرہ سو افراد کو جنگل کی سیر پر لے کر جائیں گے۔

کمپنی نے پانچ جگہوں پر زمین خرید لی ہے اور وہ ایک گولف کورس بنانے کا بھی ارادہ رکھتی ہے۔ لیکن زیادہ تر سیاح کشتیوں پر وقت گزاریں گے اور سندربن کے چھوٹے چھوٹے جزیروں کے درمیان سپیڈ بوٹ پر سفر کریں گے۔

اس منصوبے پر کام شروع ہونے میں ابھی کچھ مہینے لگیں گے لیکن اس کے بارے میں تنازعہ شروع ہو گیا ہے۔

ماحولیات کے کارکنوں کا کہنا ہے کہ اس منصوبے کے بہت سے پہلوؤں کو خفیہ رکھا جا رہا ہے۔ ان کا کہنا ہے کہ اتنے بڑے منصوبے سے یقیناً جنگل کے ماحول کو نقصان پہنچے گا۔