سائبیریا سے 18 ہزار سال پرانا ’کتا‘ دریافت، سائنسدان اچنبھے میں پڑ گئے
،تصویر کا ذریعہLove Dalen
دنیا کے سرد ترین علاقوں میں سے ایک سائبیریا سے 18 ہزار سال قدیم ایک پِلّا دریافت ہوا ہے جس کے متعلق محققین جاننے کی کوشش کر رہے ہیں کہ یہ بھیڑیا ہے یا کتا؟
اس کی موت تقریباً دو ماہ کی عمر میں ہوئی تھی اور یہ روس کے برفانی میدانوں میں حیرت انگیز طور پر صدیوں تک محفوظ رہا ہے۔ یہاں تک کہ اس کی بالوں سے بھری جلد، ناک اور دانت تک محفوظ ہیں۔
سائنسدانوں نے اس کے ڈی این اے کا موازنہ دیگر معلوم جانوروں سے کیا ہے مگر وہ اس کی نوع کا پتا لگانے میں ناکام رہے ہیں۔
چنانچہ سائنسدانوں کا کہنا ہے کہ ممکنہ طور پر یہ جانور بھیڑیوں اور جدید کتوں کے درمیان کی ارتقائی نسل سے تعلق رکھتا ہو۔
یہ بھی پڑھیے
End of سب سے زیادہ پڑھی جانے والی
،تصویر کا ذریعہSergey Fedorov
ریڈیو کاربن ڈیٹنگ کی تکنیک کے ذریعے سائنسدانوں نے یہ معلوم کیا کہ مرنے کے وقت اس کی عمر کیا تھی اور اس کو منجمد ہوئے کتنا عرصہ گزر چکا ہے۔
اس کے جینیاتی تجزیے سے معلوم ہوا ہے کہ یہ ایک نر تھا۔
سوئیڈن کے سینٹر فار پیلیوجینیٹکس میں محقق ڈیو سٹینٹن نے سی این این کو بتایا کہ ڈی این اے سیکوئنسنگ میں ناکامی کا مطلب یہ ہے کہ ممکنہ طور پر یہ جانور کتوں اور بھیڑیوں کے مشترکہ جد کی آبادی سے تعلق رکھتا ہو۔
انھوں نے کہا ’ہمیں اس سے پہلے ہی بہت ڈیٹا حاصل ہو چکا ہے اور اتنے زیادہ ڈیٹا کے ساتھ امید ہوتی ہے کہ یہ معلوم ہوجائے کہ یہ کتا ہے یا بھیڑیا۔‘
،تصویر کا ذریعہSergey Fedorov
سینٹر کے ایک اور محقق لو ڈیلن نے ایک سوال ٹویٹ کیا کہ کیا یہ جانور ایک بھیڑیے کا پِلّا ہے یا ’ممکنہ طور پر آج تک دریافت ہونے والا قدیم ترین کتا۔‘
سائنسدان اس کی ڈی این اے سیکوئنسنگ جاری رکھیں گے اور ان کا ماننا ہے کہ نتائج کتوں کے ارتقا کے بارے میں بہت کچھ بتا سکتے ہیں۔
اس پِلّے کو ’ڈوگور‘ کا نام دیا گیا ہے جس کا مطلب روس میں بولی جانے والی یاکوٹ زبان میں ’دوست‘ ہے۔ اس کے علاوہ یہ ’ڈوگ اور وولف؟‘ (کتا یا بھیڑیا؟) سوال کا ابتدائی حصہ بھی ہے۔
جدید کتوں کے بارے میں مانا جاتا ہے کہ وہ بھیڑیوں کی نسل سے تعلق رکھتے ہیں مگر اس بات پر بحث کی جاتی رہی ہے کہ کتوں کو انسان نے سدھا کر اپنے کام میں لانا کب شروع کیا۔
سنہ 2017 میں شائع ہونے والی ایک تحقیق کے مطابق انسانوں نے یہ عمل 20 ہزار سے 40 ہزار سال پہلے کیا ہو گا۔
،تصویر کا ذریعہLove Dalen
۔
