میں گلے بھی لگا سکتا ہوں۔۔۔۔ صدر آصف زرداری

امریکی ریاست الاسکا کی گورنر اور امریکی نائب صدر کی امیدوار سارہ پیلن خارجہ پالیسی میں اپنی ناتجربہ کاری کو ختم کرنے کے لیے اقوام متحدہ کی جنرل اسمبلی کے اجلاس میں شرکت کے لیے آنے والے عالمی لیڈروں سے ملاقاتیں کر رہی ہیں۔

امریکہ میں صدر زرداری کی مصروفیات

امریکی ذرائع ابلاغ کے مطابق جب سارہ پیلن پاکستانی صدر آصف زرداری سے ملاقات کے لیے نیویارک کے ہوٹل پہنچیں تو ان کا استقبال پاکستان کی خاتون وزیر شیری رحمان یہ کہہ کر کیا کہ یہ کیسے ممکن ہے کہ اتنی مصروف شخصیت اتنی خوبصورت بھی لگے۔

سارہ ابھی شیری رحمن کا شکریہ ہی ادا کر رہی تھیں کہ چہرے پر مسکراہٹ سجائے صدر آصف زرداری کمرے میں داخل ہوئے اور ان سے ہاتھ ملایا۔آصف زرداری نے کہا ’ آپ انتہائی حسین ہیں اور اب پتہ چلا ہے کہ امریکی عوام آپکی کی دیوانی کیوں ہے۔‘

سارہ پیلن نے مسکراتے ہوئے جواب دیا’ آپ کتنے اچھے ہیں‘۔

جب دونوں رہنما ہاتھ ملا کر اپنی نشستوں پر بیٹھنے لگے تو پاکستانی وفد کے ایک رکن نے دونوں رہنماؤں کو مشورہ دیا کہ وہ فوٹوگرافروں کو تصویر کا موقع دینے کے لیے ہاتھ ملاتے رہیں۔

آصف زرداری نے ہنستے ہوئے کہا کہ اگر اس نے اسی طرح اصرار کیا تو میں گلے بھی لگا سکتا ہوں جس پر سارہ پیلن مسکرا دیں۔