صدر بش کا مشرق وسطیٰ کا پانچ دن کا دورہ اتوار کو ختم ہو رہا ہے

امریکہ کے صدر جارج بش اتوار کوفلسطینی وزیر اعظم سلام فیاض اور اردن کے شاہ عبداللہ سے بھی ملاقات کریں گے۔

شرم الشیخ میں قیام کے دوران صدر بش کی لبنان کے وزیر اعظم فواد سینیوا سے ملاقات بھی ان کی مصروفیات میں شامل تھی۔

صدر بش کی لبنان کے وزیر اعظم فواد سینیورا سے ملاقات کا مقصد لبنان میں حزب مخالف سے مذاکرات میں پیش رفت کے بارے میں بھی آگہی حاصل کرنا تھا۔ اس ملاقات کو آخری موقع پر منسوخ کر دیا گیا اور اس کے اچانک منسوخ کیئے جانے کی وجوہات بھی نہیں بتائی گئیں۔

اتوار کو صدر بش اپنے میزبان صدر حسنی مبارک کے ساتھ مشرق وسطیٰ پر عالمی اقتصادی فورم کے اجلاس سے بھی خطاب کریں گے۔

	صدر بش نے وزیر اعظم یوسف رضا گیلانی سے بھی ملاقات کی

اطلاعات کے مطابق صدر بش کی پاکستان کے وزیر اعظم یوسف رضا گیلانی سے بھی ملاقات ہو رہی ہے۔

اس ملاقات میں دو طرفہ امور کے علاور دہشت گردی کے خلاف عالمی جنگ کا موضوع بھی زیر بحث آئےگا۔

امریکی خبررساں ادارے ایسوسی ایٹڈ پریس کے مطابق اس دورے میں صدر بش نے اسرائیل کی تعریفوں کے پل باندھ دیئے اور عربوں کو صرف وعدے اور نصیحتیں سننے کو ملی ہیں۔

اے پی نے مصر سے اپنے مراسلے میں کہا ہے کہ اتوار کو صدر بش عرب رہنماؤں سے ملاقات کے دوران عرب ملکوں کو کیا کرنے اور کیا نہ کرنے کی تلقین کریں گے۔

صدر بش کی طرف سے عرب ملکوں کو کی جانے والی نصیحتوں میں تجارتی اور اقتصادی پابندیوں میں نرمی، جمہوریت کی سمت میں سیاسی اصلاحات، معاشرے میں نوجوانوں اور خواتین کو مزید فعل کرنا اور ایران اور شام سے دور رہنے کے مشورے شامل ہیں۔

عالمی اقتصادی فورم پر اپنے خطاب کے بارے میں بتاتے ہوئے صدر بش نے کہا کہ وہ عرب ملکوں پر واضح کریں گے کہ خوشحالی کو صرف سیاسی اور معاشی آزادیوں سے ہی یقینی بنایا جا سکتا ہے۔