اشتہارات اور پروگرام میں جدت کے باعث گوگل کا منافع بڑھا ہے

گوگل کے ایرک شمٹ نے کہا ہے کہ گوگل کی تلاش، اشتہارات اور پروگرام میں جدت کے باعث منافع میں اضافہ ہوا ہے۔

گوگل کا کہنا ہے کہ اس کی’سیلز‘ بیالیس فیصد اضافے کے ساتھ پانچ بلین ڈالر رہی ہے۔ واضح رہے کہ خدشہ ظاہر کیا جا رہا تھا کہ گوگل کو امریکہ کی معیشت میں سست روی کی وجہ سے نقصان ہو گا۔

یہ پہلا موقع ہے کہ گوگل نے زیادہ منافع بیرونِ ملک کمایا ہے۔ اس منافع کے اعلان سے قبل گوگل کے حصص ساڑھے پانچ ڈالر گر گئے تھے تاہم منافع کے اعلان کے بعد ان میں دوبارہ اضافہ ہوا۔

گوگل کے حصص نے پچھلے سال نومبر میں بلندیوں کو چھوا تھا جب اس کے حصص کی قیمت تقریباً سات سو بیالیس ڈالر ہو گئی تھی۔ لیکن اس کے بعد سے اس کے حصص کی قیمت میں کمی آئی تھی جس کی وجہ امریکی معیشت میں تنزلی کو قرار دیا گیا تھا۔

گوگل کی آمدنی کا ذریعہ وہ اشتہارات ہیں جن پر انٹرنیٹ سرچ انجن استعمال کرنے والے کلک کرتے ہیں۔ تحقیقاتی کمپنی کام سکور کے مطابق انٹرنیٹ استعمال کرنے والے اب کم ہی اشتہارات پر کلک کرتے ہیں اور اس سے یہ خدشہ پیدا ہو رہا ہے کہ گوگل کے اچھے دن ختم ہو رہے ہیں۔