گزشتہ ماہ قندھار میں ایک دھماکہ میں نیٹو کے تین فوجیوں سمیت سو سے زیادہ افراد ہلاک ہوگئے تھے

حکام نے بتایا ہے کہ ایک کار عین اس وقت جب سڑک پر رش زیادہ تھا، ائر پورٹ کے قریب ایک بکتر بند گاڑی کے پاس آ کر رکی اور دھماکہ ہو گیا۔

عینی شاہدین کا کہنا ہے کہ دھماکے سے گاڑی مکمل طور پر تباہ ہو گئی۔

ائرپورٹ کے قریب واقع یہ سڑک جہاں دھماکہ ہوا ہے اسے کابل میں تعینات غیر ملکی فوجی باقاعدگی سے استعمال کرتے ہیں۔

حالیہ برسوں میں اس سڑک پر طالبان مزاحمت کاروں کی طرف سے کئی خود کش حملے کیے گئے ہیں۔

گزشتہ ماہ اٹھارہ فروری کو جنوبی افغانستان میں ایک بم دھماکے میں کم از کم پینتیس افراد ہلاک اور بیس سے زائد زخمی ہوگئے تھے۔ پولیس حکام کا کہنا تھا کہ مرنے والوں میں تین کا تعلق نیٹو فوج سے تھا۔

نیٹو افواج افغانستان میں طالبان کے خلاف کارروائی کر رہی ہیں۔

اس برس افغانستان میں کم ازکم پندرہ غیر ملکی فوجی ہلاک ہوئے ہیں۔ جن میں زیادہ ترامریکی فوجی تھے۔اس وقت افغانستان میں چالیس ہزار نیٹو افواج تعینات ہے۔

علاقے میں حال ہی میں ہونے والے کئی خود کش اور دیگر بم حملوں میں طالبان باغیوں کا ہاتھ رہا ہے۔گزشتہ ہفتے قندھار کے گورنر ایک بم حملے میں بال بال بچے تھے۔