صدر بش کی صدارت کی مدت اس سال ختم ہو رہی ہے

صدر بش نے اس سال کے آخر میں اپنی صدارت کی مدت کے ختم ہونے سے پہلے کانگرس میں اپنے سالانہ اسٹیٹ آف یونین خطاب میں کہا کہ گزشتہ سال عراق میں امریکی فوجیوں کی تعداد میں اضافے سے تشدد میں کمی ہوئی اور جلد بازی میں امریکی فوجیوں کے انخلاء سے اس پر برا اثر پڑے گا۔

انہوں نے کہا کہ ’اتنی پیش رفت اور اتنا کچھ حاصل کرنے کےبعد ہمیں ایسا نہیں ہونے دینا چاہیے۔‘

صدر بش نے کہا کہ بیس ہزار سے زیادہ فوجیوں کو واپس بلایا جائے گا لیکن مزید فوجیوں کا انخلاء عراق کے حالات اور فوجی کمانڈروں کے مشورے پر ہوگا۔

صدر بش کے خطاب کے دوران کانگرس کے ارکان صدر کی تقریر کی حمایت اور تائید میں پرجوش انداز میں کھڑے ہو ہو کر تالیاں بجاتے رہے۔ نامہ نگاروں کے مطابق کانگرس کےارکان نے صدر بش کے خطاب کے دوران انہتر مرتبہ کھڑے ہو کر تالیاں بجائیں۔

امریکہ کی اقتصادی حالت کا ذکر کرتے ہوئے صدر بش نے اعتراف کیا کہ اقتصادی ترقی کی رفتار میں کمی واقع ہو رہی ہے۔ تاہم انہوں نے اس بات پر اصرار کیا کہ یہ امریکہ کی معیشت مضبوط بنیادوں پر استوار ہے۔

انہوں نے کہا کہ مستقبل قریب میں اقتصادی ترقی کی رفتار میں کمی آ سکتی ہے لیکن مستقبل بعید میں امریکہ کے عوام کو یقین رکھنا چاہیے کہ ترقی کی رفتار برقرار رہے گی۔

انہوں نے کہا کہ کانگرس کے ارکان سے اس بات پر اتفاق ہوا ہے کہ حکومت اقتصادی ترقی کی رفتار کو بڑھانے کے لیے ڈیڑھ سو ارب ڈالر فراہم کرے گی تاہم انہوں نے سینیٹ کے ارکان پر زور دیا کہ وہ اس میں زیادہ شرائط نہ لگائیں۔

عالمی تجارت کے حوالے سے انہوں نے کہا کہ عالمی طاقتوں کو ایک اچھا معاہدہ ترتیب دینا چاہیے جو کہ دوحہ راونڈ سے بہتر ہو۔

مشرق وسطی کے بارے میں بات کرتے ہوئے امریکہ کے صدر نے کہا کہ وقت آ گیا ہے کہ جمہوری اسرائیل اور جمہوری فلسطین ساتھ ساتھ رہیں۔ انہوں نے دونوں کو اس مقصد کے حصول کے لیے بھرپور مدد فراہم کرنے کے عزم کا اعادہ کیا۔

صدر بش نے کہا کہ فلسطین اسرائیل تنازعہ کو حل کرنے کے لیے کی جانے والی سفارتی کوششیں امریکہ کی طرف سے دہشت گردی کے خلاف جنگ کا حصہ تھیں۔

انہوں نے کہا کہ اس مقدس سرزمین میں وہ شدت پسند قوتوں کے مقابل کھڑے ہیں۔ جہاں ایک امید پیدا ہوئی ہے۔