نئے جھنڈے سے تینوں ستارے ہٹا دئے گئے ہیں

کردوں نے صدام حسین کی حکومت کا تختہ پلٹے جانے کے بعد پرانا پرچم استعمال کرنے سے انکار کر دیا تھا کیونکہ بقول ان کے اس جھنڈے کا اس دور کی زیادتیوں سے گہرا تعلق ہے۔

قومی پرچم میں دو ہزار چار میں بھی تبدیلی کی گئی تھی جب اس پر درج ’اللہ اکبر‘ کا فانٹ بدلا گیا تھا کیونکہ مبینہ طور پر اصل عبارت خود صدام حیسن کی ہاتھ سے لکھی ہوئی تھی۔

لیکن یہ تبدیلی بھی عارضی ہے جس کی منظوری پچاس کے مقابلے میں ایک سو دس ووٹ سے دی گئی۔

بغداد سے نامہ نگار جانی ڈائمنڈ کا کہنا ہے کہ جھنڈے کے ڈیزائن پر اتفاق سے لگتا ہے کہ پارلیمان میں مشکل مسائل پر بھی پیش رفت ہو رہی ہے۔

دس روز قبل پارلیمان نے ایک نئی تجویز کی منظوری دی تھی جس کے تحت بعث پارٹی کے سابق ارکان کی سرکاری ملازمتوں اور فوج میں بھرتی پر عائد پابندی ہٹا لی گئی تھی۔

لیکن اتحاد کی راہ میں اب بھی بڑے مسائل حائل ہیں۔ مثال کے طور پر منگل کو پارلیمان میں بجٹ منظور نہیں کیا جاسکا۔

نئے پرچم میں پرانے جھنڈے کے تینوں رنگ لال، سفید اور کالا شامل ہیں۔ لیکن بعث پارٹی کے نظریہ(اتحاد، آزادی اور سوشلزم) کی علامت ستارے ہٹا دیے گئے ہیں۔
سن دو ہزار چار میں امریکہ کی تقرر کردہ حکمراں کونسل نے ایک جھنڈے کا ڈیزائن پیش کیا تھا لیکن اسے مسترد کر دیا گیا کیونکہ بقول ناقدین یہ ڈیزائن اسرائیل کے جھنڈے سے بہت ملتا تھا۔