جنرل مائیکل سلیمان کو صدر بنانے پر حکومت اور حزب مخالف میں کوئی اختلاف نہیں

جنرل سلیمان کی حمایت کا اعلان ایک ایسے وقت کیا گیا ہے جب بائیس عرب ممالک پر مشتمل تنظیم عرب لیگ لبنان کے سیاسی بحران پر غور کرنے والی ہے۔

لبنان کی مغرب نواز حکومت اور مقابلے میں ہمسایہ ممالک شام اور ایران کی حمایت رکھنے والی حزب مخالف کے درمیان موجود اختلافات کے باعث لبنان میں تئیس نومبر سے صدر کا عہدہ خالی پڑا ہوا ہے۔

اٹھائیس دسمبر کو صدر کے انتخاب کے لیے ہونے والا لبنانی پارلیمان کا گیارہواں اجلاس گیارہ جنوی تک کے لیے ملتوی کر دیا گیا تھا۔

عرب لیگ کے سیکرٹری جنرل امر موسیٰ نے قاہرہ میں ہونے والے مشاورتی اجلاس کے بعد اخبار نویسوں کو بتایا کہ عرب لیگ وزرائے خارجہ جنرل سلیمان پر صدارتی امیدوار کے لیے پائے جانے والے اتفاقِ رائے کی حمایت کرتے ہیں اور ان کے فوری انتخاب کا مطالبہ کرتے ہیں۔

امر موسیٰ کے مطابق لبنانی حزب مخالف تنظیم حزب اللہ کی حمایت کرنے والے ملک ایران نے بھی اس اقدام کی حمایت کی ہے۔ امر موسیٰ کا کہنا ہے کہ وزراء نے تین مراحل پر مشتمل ایک منصوبے پر اتفاق کیا ہے جو اتوار کو منظور کیا جائے گا۔

	حزب اللہ کا کہنا ہے کہ اسے کابینہ میں ایک تہائی وزارتیں دی جائیں

لبنان میں حکومت اور حزب مخالف کا اس بات پر تو اتفاق ہے کہ ملک کا اگلا صدر جنرل سلیمان کو بنایا جائے لیکن مستقبل کی حکومت کے خدوخال پر فریقین کے درمیان اختلافات پائے جاتے ہیں۔

جمعہ کے روز حزب اللہ نے اعلان کیا کہ وہ اس وقت تک صدر کا انتخاب نہیں ہونے دے گی جب تک اسے کابینہ میں ایک تہائی وزارتوں کی یقین دہانی نہیں کرا دی جاتی۔

اگر حزب اللہ کو ایک تہائی وزارتیں مل جاتی ہیں تو اسے اہم فیصلوں پر ویٹو کا اختیار حاصل ہو جائے گا۔ دوسری طرف حکومت کا ارادہ ہے کہ کابینہ کے اختیارات میں ترمیم کر کے فیصلہ کن کردار نئے صدر کو دے دیا جائے۔