یہ لوگ گزشتہ پانچ ہفتوں سے طالبان کی قید میں ہیں (فائل فوٹو)

جنوبی کوریا کے صدر کے ترجمان نے کہا ہے کہ یہ معاہدہ اس شرط پر طے پایا ہے کہ کوریا اس سال کے آخر تک افغانستان سے اپنے فوجی واپس بلا لے گا۔

واضح رہے کہ طالبان نے جولائی میں صوبہ غزنی سے جنوبی کوریا سے تعلق رکھنے والے تئیس امدادی کارکنوں کو پکڑ لیا تھا۔

بعد ازاں طالبان نے دو مغویوں کو ہلاک اور دو عورتوں کو رہا کر دیا تھا۔

خبر رساں ادارے اے ایف پی کی اطلاع کے مطابق ایک افغان قبائلی سردار نے کہا ہے کہ مغویوں کو تین یا چار دن میں چھوڑ دیا جائے گا۔

لیکن جنوبی کوریا کے سرکاری خبر رساں ادارے نے صدارتی ترجمان چین ہو سین کے حوالے سے بتایا ہے کہ فی الحال مغویوں کی رہائی کے وقت کی تصدیق نہیں کی جا سکتی۔

ترجمان نے مزید کہا کہ جنوبی کوریا اس بات پر بھی متفق ہوگیا ہے کہ اس کے شہری عیسائی مبلغوں کے طور پر افغانستان میں کام نہیں کریں گے۔