مائیکل کلوکی بی بی سی نیوز، لیمورو

	گدھے کو لنگوٹ باندھنے کی کوشش کا انجام اکثر دولتّی کی شکل میں سامنے آتا

میونسپل کونسل کا کہنا ہے کہ مذکورہ حکم کا اطلاق سولہ جولائی سے ہونا تھا اور اس کا مقصد شہر کی سڑکوں کو صاف رکھنا ہے۔ لیکن اس خبر کے ذرائع ابلاغ میں آنے اور شہریوں کےاحتجاج کے بعد حکام فی الحال اس منصوبے کو موخر کرنے پر مجبور ہو گئے ہیں۔

گدھے پالنے والے ایک شخص کا کہنا تھا کہ ’ اگر ہم گدھوں کو نیپی پہنانے لگ گئے تو کل حکام کہیں گے کہ گائے کو بھی پہنائیں۔‘

اس سلسلے میں شہر کے میئر جیمز کوریا نے کہا کہ ’ ہمیں کوئی طریقہ نکالنا پڑے گا کہ گوبر سے ہماری جان چھوٹے۔‘

دارالحکومت نیروبی سے پچاس کلومیٹر دور اس قصبے میں گدھے پالنے والے ایک دوسرے شخص کا کہنا تھا کہ کونسل کا یہ منصوبہ قابل عمل نہیں، اس لیے انہیں چاہیئے کہ وہ مزید خاکروب بھرتی کریں۔

مہلک دو لتّیاں
کمیونٹی میں گدھوں کے اہم کردار کا ذکر کرتے ہوئے اس شخص کا مزید کہنا تھا کہ ’ گدھے بہت اہم ہیں۔ اس علاقے میں اکثر لوگوں کے پاس کاریں نہیں ہیں اور گدھے ٹرنسپورٹ کا بڑا ذریعہ ہیں۔‘

	کونسل کوچاہیئے کہ وہ مزید خاکروب بھرتی کرے

قصبے میں پانی کا کاروبار کرنے والے ایک شخص سائمن کماؤ لوگوں کے گھروں پر پانی پہنچانے کے لیے گدھے استعمال کرتے ہیں۔ انہوں نے کہا کہ ’میں گزشتہ تین سال سے یہ کاروبار کر رہا ہوں اورگدھے استعمال کر رہا ہوں۔ میں نے تو کبھی گدھوں کو لنگوٹ نہیں باندھے۔ لنگوٹ پہنانے میں سب سے بڑا مسئلہ یہ ہے کہ گدھا آپ کو دو لتّی بھی مار سکتا ہے جو کافی مہلک ہو سکتی ہے۔ ایک مرتبہ ایک گدھے نے دولتّی مار کر میری ٹانگ توڑ دی تھی۔‘

سائمن کا مزید کہنا تھا کہ ’ کونسل کو چاہئیے کہ مجھ جیسے کاروباری لوگوں کے پاس آئے اور ہمیں دکھائے کہ گدھوں کو نیپی کیسے پہناتے ہیں۔‘

دوسری جانب لگتا ہے کہ میئر مسٹر کوریا اپنے منصوبے کو عملی جامہ پہنانے کے بارے میں سنجید ہیں۔ ان کا کہنا تھا: ’ میں نے سنا ہے کہ کچھ علاقوں میں جہاں لوگ گدھے پالتے ہیں وہ گدھوں کو لنگوٹ بھی باندھتے ہیں۔ہم ان علاقوں کا دورہ کریں گے اور پھر واپس آ کر اپنے لوگوں کو یہ طریقہ سکھائیں گے۔ہم چاہتے ہیں کہ لوگ اپنے روزگار جاری رکھیں لیکن ساتھ ساتھ شہر کو بھی صاف رکھیں۔‘