ضیا احمد جنیوا

کون سا گدھا بہتر ہے؟

چار مئی:’ کنجوس کا گدھا‘

بیگم اور میں دونوں ہی نہایت کنجوس ہیں۔ ضرورت سے زیادہ ایک پیسا ہاتھ سے نہیں جانے دیتے۔ جب جنیوا آئے تو یہاں کے بَس اور ٹرین کے نظام اور اپنی کنجوسی سے اس قدر متاثر ہوئے کہ گاڑی نہ خریدنے کا فیصلہ کیا۔ میری مصروفیات کچھ ایسی ہیں کہ دن کا وقت گھر پر ہی گزرتا ہے اس لیے گاڑی کی کمی محسوس نہیں ہوتی۔ (سوچتا ہوں کہ ہمسایوں کے کتّوں کی دیکھ بھال کرکے کچھ پیسے ہی کما لوں۔) لیکن بیگم کا دفتر بیس پچیس منٹ پیدل کا راستہ ہے۔ بَس کا کرایہ ہے تین فرینک یعنی ایک سو اڑتیس پاکستانی روپے! ایسے حالات میں ایک کنجوس کرے تو کیا کرے؟

تو جناب اپنی آسانی کے لیے ہم نے امریکہ سے کنجوسوں کی دو سواریاں منگوائیں۔ یعنی اسکوٹر۔ مگر یہ میرے ابّو کی سن پچھتّر کی ویسپا نہیں۔ یہ تو بچّوں کے کھیلنے کی ریزر اسکوٹریں ہیں۔ نہایت ہلکی پھلکی۔ جب ضرورت نہ ہو تو چھوٹی سی جگہ میں سِمٹ جاتی ہیں۔

ہمارا گھر ایک معمولی سی پہاڑی پر واقع ہے۔ ڈھلان پر اسکوٹر ایسی بھاگتی ہے جیسے شوماکر کی فراری ہو! بیگم کا دفتر کا سفر اب صرف دس پندرہ منٹ میں طے ہوجاتا ہے۔ واپسی کا سفر اتنا آسان نہیں لیکن خاگِینہ بنانے کے لیے انڈے تو توڑنے پڑتے ہیں۔

میں دوپہر کے وقت اکثر بیگم کے ساتھ کھانا کھانے یا پھر سودا سلف خریدنے نکل جاتا ہوں۔ شروع شروع میں تو اسکوٹر سواری پر کچھ شرم آئی۔ ایک نوجوان کو بچّوں کے کھلونے پر سوار دیکھ کر لوگ کیا سوچیں گے؟ لوگوں کو دیکھ کر اسکوٹر سے فوراً اتر جاتا۔ اور اسکوٹر کو اپنے ساتھ دھکیلنے لگتا۔ لیکن پھر مجھے ملا نصرالدّین کی وہ کہانی یاد آئی جس میں ملا اپنے بیٹے اور گدھے کے ساتھ بازار جاتے ہیں۔ خواہ گدھے پر کوئی بیٹھے یا نہ بیٹھے، دیکھنے والے خوب باتیں بناتے ہیں۔

تو یوں سمجھیے کہ اسکوٹر میرا گدھا ہے۔ لوگوں کی کیا پروہ کرنی؟ میرا گدھا مجھے نہایت پھرتی سے بازار لےجاتا ہے۔ اِس گدھے کی بدولت اب میری کئی چھوٹے چھوٹے بچّوں سے بھی دوستی ہوگئی ہے۔

’آپ کیا کہتے ہیں‘

عبدالوحید خان، برمنگھم:
اگر گدھے کے سینگ ہوتے تو آپ سکوٹر کی طرح انہیں استعمال کر لیتے لیکن اب مصیبت یہ ہے کہ گدھے پر بیٹہ کر اس کے کان تو نہیں پکڑے جا سکتے۔

ثناء خان، کراچی:
کنجوسی کی بھی حد ہوتی ہے، اتنے کنجوس تو اپنے میمن بھائی بھی نہیں ہو نگے۔ رہی بات سکوٹی چلانے کی تو اچھی بات ہے، میرے پاس بھی سکوٹی ہے مگر صرف چھت اور گارڈن میں چلاتی ہوں۔

آغا علی عباس، انڈیا:
بہت اچھا ہے!

چھبیس اپریل: ’حساس ڈینمارک‘

ایک بات اور ہے جس کا ذکر پوسٹر میں نہیں۔ لیگو کمپنی کا تعلق ڈینمارک سے ہے۔ جی ہاں، وہی ڈینمارک جہاں سے ان بدنام کارٹونوں کا سلسلہ شروع ہوا تھا۔ ڈینمارک اور لیگو کمپنی دونوں ہی نے پوسٹر کا الٹا مطلب لیا۔ یعنی کہ لیگو کی اینٹ ڈینمارک ہے جو کہ جِگ سا پزل کے ٹکڑوں، یعنی مسلمانوں، کے خلاف تعصّب کررہا ہے۔ ڈینمارک کے دفترِ خارجہ اور لیگو کمپنی نے ذوردار احتجاج کیا کہ اس پوسٹر کے ذریعے ڈینمارک کے خلاف ایک ڈھکا چھپا پیغام عوام کو بھیجا جارہا ہے۔ نتیجتاً پوسٹر اقوامِ متحدہ کی دیگر ویب سائیٹوں سے ہٹا لیا گیا۔

اتفاق سے میری بیگم انسانی حقوق کے ہائے کمشنر کے دفتر ہی میں کام کرتی ہیں۔ پوسٹر کے مصوّر ان کے ساتھی ہیں۔ نہایت شریف امریکی صاحب ہیں۔ ان کے وہم و گمان میں بھی نہ تھا کہ پوسٹر میں دیکھنے والے کوئی منفی معنی نکالیں گے۔ اصل مسئلہ یہ ہے کہ تمام فریقین اتنے حساس ہوگئے ہیں کہ انہیں ہر بات میں اپنی ہتک محسوس ہوتی ہے۔ اقوامِ متحدہ ایک معصوم سی تنظیم ہے جس کو برا بھلا کہ کر لوگ اپنے دل کی بھڑاس نکال لیتے ہیں۔

ویسے یہ ڈینمارک کے آزادیِ خیال و بیان کے اصول کو کیا ہوا؟ کارٹون تنازعے کے وقت تو یہ اصول خوب پھول رہا تھا۔ اب ذرا سے پوسٹر پر کیوں مرجھا گیا ہے؟ اصول کے مطابق تو نہ کارٹونوں پر کوئی قانونی قید ہونی چاہیے اور نہ ہی اس پوسٹر پر۔ اس سے پہلے کے کچھ پڑھنے والے آگ بگولہ ہوکر میرے خون کے پیاسے ہونے لگیں، غور کیجیے کہ میں نے قانونی قید کا ذکر کیا ہے، اخلاقی فرض کا نہیں۔ ویسے یہی غنیمت ہے کہ ڈینمارک نے صرف زبانی احتجاج کیا ہے۔ اگر میرے پاکستانی بھائیوں کی نظر میں کوئی نازیبا پوسٹر جاری ہوتا تو اقوامِ متحدہ کے ایک دو دفتر تو اب تک ضرور نذرِ آتش آچکے ہوتے۔

’آپ کیا کہتے ہیں‘

ریاض احمد، لاہور
یہ کسی بھی مذہب کے لیے اچھا نہیں ہے۔ ہمارا مذہب ہمیں تمام مذاہب کی عزت کی تعلیم دیتا ہے۔

منظر سہیل، میلبورن
آپ نے بالکل صحیح کہا۔ اب کہاں گیا ’آزادی تحریر‘ کا اصول؟ لیکن یہ بات بھی غور طلب ہے کہ یہ خبر بی بی سی نے نمایاں طور پر شائع نہیں کی۔ یہ بھی کہ ڈینمارک کے ایک اشارے پر یو این نے یہ پوسٹر ہٹا دیا، ملسمانوں کی بات کوئی اتنی آسانی سے کہاں مانتا ہے؟

علی محمد، پاکستان
بکواس کر رہے ہیں آپ۔ ایسے لوگوں کی وجہ سے اسلام بدنام ہو رہا ہے۔

فیصل بھگت، پاکستان
ڈینمارک کے وزیر نے اس میں پیغام پڑھ لیا لیکن اپنے کارٹونز میں نہ پڑھ سکے۔ شاید ان کی قریب کی نظر کمزور ہے۔۔۔

ایم قاسم، پاکستان
آپ لوگ درحقیقت بالکل فضول باتیں کرتے ہیں۔ آپ بھی مسلمانوں کے اتن ےہی خلاف ہیں، خاص کر پاسکتان اور پاکستانی فوج کے خلاف، جتنا یہ مغرب والے ہیں۔۔۔

شاہدہ اکرم، ابو ظہبی
ضیا صاحب ڈینمارک نے جو کچھ کیا وہ ان کی نظر میں درست ہوگا لیکن ہم اور آپ صرف باتیں کر سکتے ہیں اور بس۔۔۔