عراق میں ان دنوں کوئی سو امریکی فوج مختلف حملوں میں ہلاک ہوئے

عراق میں امریکی فوجی حکام نے مزید آٹھ فوجیوں کی ہلاکت کی تصدیق کی ہے۔ کئی پرتشدد مہینوں میں سے مئی عراق میں تعینات امریکی فوج کے لیے کہیں زیادہ پرتشدد رہا ہے جس میں اب تک ایک سو کے قریب امریکی فوجی ہلاک ہوچکے ہیں۔

صدر جارج بش پہلے ہی عراق میں تشدد میں اضافے کے خطرے کے بارے میں خبردار کر چکے ہیں۔

بی بی سی کے نامہ نگار کا کہنا ہے کہ عراق میں امریکی پالیسی کے حوالے سے اس وقت انتہائی نازک وقت ہے۔ صدر بش کی عراق میں فوجیوں کی تعداد بڑھا کر بیس ہزار تک کرنے کی پالیسی پر عمل درآمد قریب قریب مکمل ہو گیا ہے۔ فوجیوں کی تعداد میں اضافے کے ساتھ ساتھ عراق میں ایک مؤثر سیاسی حکمت عملی کی تشکیل پر جاری کام بھی آخری مراحل میں ہے۔