روسی حکام کے بقول وہ امریکہ کے ساتھ مثبت مذاکرات کرنے کے لیے تیار ہیں

روس اِس منصوبے کو غیر ضروری اور روس کی سلامتی کے لیے ایک ممکنہ خطرہ قرار دیتا ہے اور ماسکو کے اِس ردعمل کو بدلنے کی کوئی بھی امریکی کوشش دونوں ممالک کے تعلقات کی موجودہ برف کو پگھلانے میں ناکام رہی ہے۔

امریکی وزیرِ خارجہ اس وقت روس کے صدر ولادی میر پیوتن اور اُن کی حکومت کے اعلٰی اہلکاروں سے بات چیت کے لیے روس میں ہیں۔ اس سے پہلے روس کے وزیرِ خارجہ، سرگے لاواروو نے اعلان کیا تھا کہ ماسکو اور واشنگٹن نے دونوں ممالک کے اختلافات کا برملا اظہار نہ کرنے پر اتفاق کر لیا ہے۔

ڈاکٹر رائس روس کا دورہ ایک ایسے وقت میں کر رہی ہیں جب واشنگٹن اور ماسکو کے درمیان تعلقات میں خاصا تناؤ ہے۔ تاہم دارالحکومت ماسکو پہنچنے پر انہوں نے ایک نئی سرد جنگ کے امکان کو یکسر رد کیا۔ دونوں ممالک بیشتر امور پر تنازعات کا شکار ہیں جن میں امریکہ کی جانب سے یورپ میں میزائل کا دفاعی نظام نصب کرنے کا معاملہ اور اس کی سربیا کے صوبے کوسوو کی خود مختاری کی حمایت پر بھی اعتراض ہے۔

روس اِس وقت دو محازوں پر مغرب کے ساتھ اپنے تعلقات میں تناؤ محسوس کر رہا ہے۔ یورپی کمیشن کے ایک اعلی اہلکار نے حال ہی میں خبردار کیا تھا کہ روس اور یورپی یونین کے موجودہ تعلقات سرد جنگ کے خاتمے کے بعد سب سے ابتر ہیں۔

جرمنی کے وزیر خارجہ فرینک والٹر سٹینمئیر نے بھی روس کے صدر سے ملاقات کرنی ہے۔ ملاقات کا مقصد اِس ہفتے یورپی یونین اور روس کے درمیان ہونے والے سربراہی اجلاس سے پہلے اختلافات کو کسی حد تک کم کرنا ہے